തിരുവനന്തപുരം: ബന്ധുവീട്ടിലെ കുളത്തിൽ കുളിക്കാൻ പോയ യുവതിയെ കെട്ടിയിട്ട് പീഡിപ്പിക്കാൻ ശ്രമിച്ചു. തിരുവനന്തപുരം കല്ലമ്പലത്ത് ആണ് സംഭവം. ഇരുപത്തിരണ്ടുകാരിയെയാണ് നാലുപേർ ചേർന്ന് കെട്ടിയിട്ട് പീഡിപ്പിക്കാൻ ശ്രമിച്ചത്.

കുളിക്കാനും അലക്കാനും വീടിന് സമീപത്തുള്ള ബന്ധുവീട്ടിലെ കുളത്തിലാണ് യുവതി പതിവായി പോയിരുന്നത്. ഇന്നലെ ഇവിടെയെത്തിയപ്പോൾ ബന്ധുവീട്ടിൽ ആരുമുണ്ടായിരുന്നില്ല. ഈ സമയം വീട് തിരക്കി അപരിചിതനായ ഒരാൾ എത്തിയിരുന്നു. ഇയാൾ മടങ്ങി കുറച്ച് സമയത്തിന്‌ ശേഷമാണ് നാലുപേർ ഇവിടേക്കെത്തി ആക്രമിക്കാൻ ശ്രമിച്ചത്.

കൈയും കാലും കെട്ടിയിട്ട് വായിൽ ഷാൾ തിരുകിയ ശേഷമായിരുന്നു പീഡിപ്പിക്കാൻ ശ്രമിച്ചത്.പിടിവലിക്കിടയിൽ ഭിത്തിയിൽ തലയിടിച്ച് ഇരുപത്തിരണ്ടുകാരിയുടെ ബോധം നഷ്ടമായി. ഇതോടെ പ്രതികൾ ഓടി രക്ഷപ്പെടുകയായിരുന്നു. ഏറെ സമയം കഴിഞ്ഞും മകൾ വീട്ടിൽ തിരിച്ചെത്താത്തതിനാൽ അമ്മ അന്വേഷിച്ചെത്തിയതാണ് കെട്ടിയിട്ട നിലയിൽ കണ്ടെത്തിയത്. യുവതിയേയും കുടുംബത്തേയും അടുത്തറിയാവുന്ന ആളുകളാണ് സംഭവത്തിന് പിന്നിലെന്നാണ് പൊലീസ് സംശയിക്കുന്നത്.