ഡല്‍ഹിയില്‍ പാലത്തിനടിയില്‍ കുടുങ്ങിയ എയര്‍ ഇന്ത്യ വിമാനത്തിന്‍റെ ദൃശ്യങ്ങൾ കഴിഞ്ഞ ദിവസങ്ങളിൽ സോഷ്യൽ മീഡിയയിൽ വൻചർച്ചയ്ക്ക് വഴിവച്ചിരുന്നു, വിമാനം ഓവര്‍ ബ്രിഡ്ജിനു എങ്ങനെ കുടുങ്ങിയതെന്നാലോചിച്ച് തല പുകച്ചവർക്ക് മറുപടിയുമായി രംഗത്തെത്തിയിരിക്കുകയാണ് എയർ ഇന്ത്യ.
വിമാനം പാലത്തിനടിയിൽ കുടുങ്ങിയതൊക്കെ ,സത്യം തന്നെ. എന്നാൽ എയർ ഇന്ത്യ ഉപേക്ഷിച്ച പഴയ വിമാനം പൊളിക്കാനായി റോഡിലൂടെ കൊണ്ടുപോകുന്നതിനിടെയാണ് സംഭവമെന്ന് മാത്രം . ചിറകുകള്‍ ഒഴിവാക്കി വിമാനം ഡൽഹി- ഗുരുഗ്രാം ഹൈവേയിലൂടെ കൊണ്ടുപോകുമ്പോള്‍ ഡൽഹി വിമാനത്താവളത്തിന് സമീപം പാലത്തിനടിയില്‍ കുടുങ്ങുകയായിരുന്നു. ഇതോടെ ശനിയാഴ്ച രാത്രി റോഡിൽ വന്‍ ഗതാഗതക്കുരുക്കും അനുഭവപ്പെട്ടു.
രജിസ്ട്രേഷൻ റദ്ദാക്കി വിൽപ്പന നടത്തിയ വിമാനം പൊളിക്കാന്‍ കൊണ്ടു പോകുകയായിരുന്നെന്നാണ് എയര്‍ ഇന്ത്യ വ്യക്തമാക്കുന്നത്. ഈ വിമാനവുമായി എയർ ഇന്ത്യക്ക് ഇപ്പോൾ ഒരു ബന്ധവുമില്ലെന്നും അധികൃതർ അറിയിച്ചു. ഡ്രൈവറുടെ ഭാഗത്ത് പറ്റിയ പിശകാകും വിമാനം കുടുങ്ങാൻ കാരണമെന്നും വിമാനം തങ്ങളുടെ ഭാഗമല്ലെന്നും ഡൽഹി എയർപോർട്ട് അധികൃതരും വ്യക്തമാക്കി.