കേശസംരക്ഷണത്തിൽ ഒലിവ് എണ്ണ വളരെയധികം പ്രാധാന്യം വഹിക്കുന്നു. മുടി വരണ്ടതാണെങ്കിലും എണ്ണമയമുള്ളതാണെങ്കിലും ഒലിവ് എണ്ണ ഫലപ്രദമാണ്. മുടിക്കുണ്ടാകുന്ന കേടുപാടുകൾ തടയാനും തലയോട്ടിയിൽ മൃതകോശങ്ങൾ അടിഞ്ഞുകൂടുന്നത് ഒഴിവാക്കാനും ഒലിവ് എണ്ണയ്ക്ക് കഴിയും. ഇതിൽ അടങ്ങിയിട്ടുള്ള ഒമേഗ 3 ഫാറ്റി ആസിഡ് മുടിയുടെ വരൾച്ചയും തുമ്പ് പൊട്ടലും തടയുന്നു. മുടിയുടെ ആരോഗ്യത്തിനായി ഒലിവ് എണ്ണ ഹെയർ മാസ്കുകൾ വീട്ടിൽ എളുപ്പത്തിൽ തയ്യാറാക്കാവുന്നതാണ്. വിറ്റാമിൻ എ അടങ്ങിയിരിക്കുന്നതിനാൽ ഒലിവ് അടങ്ങിയ മാസ്കുകൾ മുടിയുടെ വളർച്ച ത്വരിതപ്പെടുത്തുന്നു.

നാല് ടേ. സ്പൂൺ ഒലിവ് എണ്ണയും രണ്ട് സ്പൂൺ തേനും മിക്സ് ചെയ്യുക. ശേഷം ഈ മാസ്ക് പുരട്ടി, 30 മിനിറ്റിനുശേഷം ഷാംപൂ ഉപയോഗിച്ച് തല കഴുകാം. തേനിൽ അടങ്ങിയിരിക്കുന്ന ആന്റി ബാക്ടീരിയൽ ഘടകങ്ങൾ തലയോട്ടിയിലെ അണുബാധ, ചൊറിച്ചിൽ, വീക്കം എന്നിവ അകറ്രുന്നു. ഒരു പഴുത്ത നേന്ത്രപ്പഴം മിക്സിയിൽ അടിച്ചെടുക്കുക. അതിലേക്ക് ഒലിവ് എണ്ണ, തേൻ എന്നിവ ചേർത്ത് കുഴമ്പു രൂപത്തിലാക്കുക. മുടിയിൽ ഈ മിശ്രിതം പുരട്ടി, 30 മിനിറ്റിനുശേഷം കഴുകിക്കളയാം. നേന്ത്രപ്പഴത്തിൽ അടങ്ങിയിരിക്കുന്ന ആന്റി ഓക്സിഡന്റുകൾ മുടി കൊഴിച്ചിൽ തടയുകയും ഫാറ്റി ഓയിലുകൾ മുടിയുടെ എണ്ണമയം നിലനിറുത്തുകയും ചെയ്യും.