കാണാൻ മനോഹരമായ പുഷ്പം എന്നതിലുപരി ഒട്ടേറെ രോഗങ്ങൾ ശമിപ്പിക്കാനുള്ള ശേഷിയുള്ള ഔഷധസസ്യമാണ് ശംഖുപുഷ്പം. നല്ല ഉറക്കം കിട്ടാനും ഓർമ്മ ശക്തി വർദ്ധിപ്പിക്കാനും ഉത്കണ്ഠ കൊണ്ടുണ്ടാകുന്ന മാനസിക പിരിമുറുക്കം കുറയ്ക്കാനും ശംഖുപുഷ്പം വ്യാപകമായി ഉപയോഗിക്കുന്നുണ്ട്. നീല ശംഖുപുഷ്പ്പം ഒരുഗ്രാം വീതം തേനിൽ കുഴച്ച് ദിവസേന മൂന്നുനേരം കഴിക്കുന്നത് ഗർഭാശയ പ്രശ്നങ്ങൾ അകറ്റും. ശംഖുപുഷ്പത്തിന്റെ വേരും പൂവും ഇലയും ഒരുപോലെ ഔഷധയോഗ്യമാണ്. പല നിറങ്ങളിലുള്ള ശംഖുപുഷ്പങ്ങളുണ്ടെങ്കിലും നീലപ്പൂവുള്ള ചെടിയാണ് പ്രധാനമായും ഔഷധ നിർമ്മാണത്തിന് ഉപയോഗിക്കുന്നത്. പാമ്പ് വിഷ ചികിത്സയ്ക്കും രക്തശുദ്ധീകരണത്തിനും ആയുർവേദത്തിൽ ശംഖുപുഷ്പം ഉപയോഗിച്ച് വരുന്നു. ഇതുകൂടാതെ വാത പിത്ത രോഗങ്ങൾ,​ ശ്വാസകോശ രോഗങ്ങൾ,​ ത്വക്ക് രോഗങ്ങൾ എന്നിവയ്ക്കും ശംഖുപുഷ്പം ഉത്തമമാണ്. എന്നും രാവിലെ ശംഖുപുഷ്പ ചായ കുടിക്കുന്നത് പല ശാരീരിക പ്രശ്നങ്ങളും അകറ്റി നിറുത്തും. തിളച്ച വെള്ളത്തിൽ ശംഖുപുഷ്പത്തിന്റെ ഇതളുകളിട്ട ശേഷം വെള്ളത്തിന്റെ നിറം നീലയാകുമ്പോൾ അത് തണുപ്പിച്ച ശേഷം നാരാങ്ങാ നീര് പിഴിഞ്ഞൊഴിച്ച് കുടിക്കാം.