ദോഹ: മാസമാദ്യം ശമ്പളം കൈയിൽ കിട്ടുന്ന സമയത്ത് ഇന്ത്യൻ രൂപയ്‌ക്ക് മൂല്യം കുറഞ്ഞതിന്റെ ആശ്വാസത്തിൽ പ്രവാസികൾ. കൂടിയ മൂല്യം കിട്ടുമെന്നതുകൊണ്ട് നാട്ടിലേക്ക് പണമയക്കാൻ മണി എക്‌സ്ചേഞ്ച് കേന്ദ്രങ്ങളിൽ ഓടിയെത്തിയിരിക്കയാണ് പ്രവാസി ഭാരതീയർ.

ഒരാഴ്‌ചയോളമായി ഇന്ത്യൻ രൂപയുടെ മൂല്യം ഇടിവാണ് രേഖപ്പെടുത്തുന്നത്. ഇത് കൃത്യമായി പ്രവാസികൾക്ക് ശമ്പളം ലഭിക്കുന്ന സമയമായതോടെ ഇത് മുതലാക്കുകയാണ് പലരും. ഖത്തർ ഒരു റിയാൽ മണി എക്‌സ്ചേഞ്ച് കേന്ദ്രങ്ങളിൽ ഇന്നലെ 20.43 രൂപയാണ് ലഭിച്ചത്. ഓൺലൈനായി 20.50 ലഭിച്ചവരുണ്ട്. ശനിയാഴ്‌ച 20.50 രൂപയാണ് നിരക്ക്.

സ്വർണത്തിനും ക്രൂഡ്‌ഓയിലിനും വില കൂടുന്നതും വിപണിയിൽ അമേരിക്കൻ ഡോളർ മെച്ചപ്പെടുന്നതും രാജ്യത്ത് കഴിഞ്ഞ ആറ് മാസത്തിനിടെ ഏറ്റവും കുറഞ്ഞ മൂല്യത്തിലേക്ക് രൂപ പതിക്കാൻ കാരണമായി. ഇത് പ്രവാസികൾ പരമാവധി മുതലാക്കുകയാണ്.