കൽപറ്റ: ബത്തേരി തിരഞ്ഞെടുപ്പ് കോഴക്കേസിൽ ബി ജെ പി സംസ്ഥാന അദ്ധ്യക്ഷൻ കെ സുരേന്ദ്രന്റെ ശബ്ദ സാമ്പിൾ ഇന്ന് ക്രൈം ബ്രാഞ്ച് പരിശോധിക്കും. കാക്കനാട്ടെ ചിത്രാഞ്ജലി സ്റ്റുഡിയോയിൽവച്ചാണ് സാമ്പിൾ എടുക്കുക.
രാവിലെ പതിനൊന്ന് മണിക്ക് സ്റ്റുഡിയോയിൽ എത്തണമെന്നാവശ്യപ്പെട്ട് സുരേന്ദ്രന് ക്രൈം ബ്രാഞ്ച് നോട്ടീസ് നൽകിയിട്ടുണ്ട്.കേസിലെ പ്രധാന സാക്ഷിയായ പ്രസീത അഴീക്കോടിന്‍റെ ശബ്ദസാമ്പിളും ഇന്ന് അന്വേഷണ സംഘം ശേഖരിക്കും.രാവിലെ ഒൻപതരയോടെയാണ് പ്രസീതയുടെ ശബ്ദ സാമ്പിളെടുക്കുക.
എൻ ഡി എ സ്ഥാനാർത്ഥിയാകാൻ സി കെ ജാനുവിന് 35 ലക്ഷം രൂപ കോഴ നൽകിയെന്നാണ് കേസ്.കേസിൽ സുരേന്ദ്രൻ ഒന്നാം പ്രതിയും ജാനു രണ്ടാം പ്രതിയുമാണ്‌. ബത്തേരി ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയുടെ ഉത്തരവിന്റെ അടിസ്ഥാനത്തിലാണ് ശബ്ദ പരിശോധന നടത്തുന്നത്.