ഇനി വരുന്ന കാലം ഇലക്ട്രിക് യുഗമാണെന്ന് ഏറെക്കുറെ തീർച്ചയായിക്കഴിഞ്ഞു. വരുന്ന നാല് വർഷത്തിനുള്ളിൽ കൊച്ചു കേരളത്തിന്റെ നിരത്തുകളിൽ ഏകദേശം ഇരുപത് ലക്ഷത്തോളം ഇലക്ട്രിക് വാഹനങ്ങളാവും കുതിച്ച് പായുന്നത്. ഇതോടെ ഇലക്ട്രിക് ചാർജിംഗ് സ്റ്റേഷൻ രംഗത്തും മികച്ച ബിസിനസ് സാദ്ധ്യതകളാണ് തുറക്കപ്പെടുക. കേരളത്തിൽ വൈദ്യുതി വിതരണ രംഗത്തെ കുത്തക സ്വന്തമാക്കിയ കെ എസ് ഇ ബി ഇലക്ട്രിക് ചാർജിംഗ് സ്റ്റേഷനുകൾ സംസ്ഥാനവ്യാപകമായി ആരംഭിക്കുവാൻ തീരുമാനിച്ചിരിക്കുകയാണ്. എന്നാൽ സ്ഥല ദൗർലഭ്യവും, ഒന്നിച്ച് അനേകം ചാർജിംഗ് സ്റ്റേഷൻ തുടങ്ങുവാനുള്ള സാമ്പത്തിക ബുദ്ധിമുട്ടും കാരണം പൊതുജനങ്ങളുമായി ചേർന്ന് സ്റ്റേഷനുകൾ ആരംഭിക്കുവാനാണ് കെ എസ് ഇ ബി ലക്ഷ്യമിടുന്നത്. ഇതിനായി മൂന്ന് മോഡലുകളാണ് കെ എസ് ഇ ബിയുടെ മുന്നിലുള്ളത്.

മോഡൽ 1
ഇലക്ട്രിക് ചാർജിംഗ് സ്റ്റേഷൻ ആരംഭിക്കുന്നതിനുള്ള സ്ഥലവും, സാമ്പത്തികവുമുള്ള നിക്ഷേപകർക്കാണ് ഈ പ്ലാൻ. ഇതിൽ കെ എസ് ഇ ബി അവരുടെ നോഡൽ ഏജൻസി മുഖാന്തരം ഇലക്ട്രിക് ചാർജിംഗ് സ്റ്റേഷനുകൾ പൂർത്തീകരിച്ച് ഉടമയ്ക്ക് കൈമാറും. പദ്ധതിയിൽ നിന്നും ലഭിക്കുന്ന വരുമാനം പൂർണമായും ഉടമയ്ക്ക് ലഭിക്കും.

മോഡൽ 2
സംസ്ഥാനത്തെ പ്രധാന നിരത്തുകളുടെ വശങ്ങളിൽ സ്ഥലമുള്ളവരെ ലക്ഷ്യമിട്ടുള്ളതാണ് ഈ മോഡൽ. ഇവിടെ ഇലക്ട്രിക് ചാർജിംഗ് സ്റ്റേഷൻ തുടങ്ങാൻ സാമ്പത്തികം ഇല്ലെങ്കിലും താത്പര്യമുള്ളവർക്ക് കെ എസ് ഇ ബിയെ സമീപിക്കാം. ചാർജിംഗ് സ്റ്റേഷൻ പൂർണമായും സ്വന്തം ചിലവിൽ കെ എസ് ഇ ബി പൂർത്തിയാക്കുകയും, ലഭിക്കുന്ന വരുമാനം പങ്കിടുകയും ചെയ്യും.

മോഡൽ 3
സ്ഥലം സ്വന്തമായിട്ടുള്ളവരെയും, ചാർജിംഗ് സ്റ്റേഷൻ തുടങ്ങാൻ കുറച്ച് പണം മാത്രമുള്ളവരെയും ഉദ്ദേശിച്ചുള്ളതാണ് ഈ പദ്ധതി. ഇവിടെ ഇലക്ട്രിക് ചാർജിംഗ് സ്റ്റേഷൻ തുടങ്ങാനുള്ള പണം കെ എസ് ഇ ബിയും, ഉടമയും ചേർന്ന് നിക്ഷേപിക്കും. വരുമാനം നിക്ഷേപത്തിന്റെ അടിസ്ഥാനത്തിൽ പങ്കിട്ടെടുക്കുകയും ചെയ്യും.