കൊച്ചി: ലോകത്തെ ഏറ്റവും ഉയരത്തിലുള്ള റോഡായ ലഡാക്കിലെ ഉംലിംഗ് ലാ പാസിൽ മുത്തമിട്ട് പ്രമുഖ ഇറ്റാലിയൻ സൂപ്പർ ലക്ഷ്വറി കാർ നിർമ്മാതാക്കളായ ലംബോർഗിനിയുടെ ഉറൂസ്. സമുദ്രനിരപ്പിൽ നിന്ന് 19,300 അടി ഉയരത്തിലുള്ള ഉംലിംഗ് ലാ പാസ് കീഴടക്കിയതോടെ, ഇത്രയും ഉയരത്തിലെത്തുന്ന ആദ്യ ലംബോർഗിനി മോഡലെന്ന പട്ടവും ഉറൂസ് ചൂടി.
ബോർഡർ റോഡ്‌സ് ഓർഗനൈസേഷൻ (ബി.ആർ.ഒ) ആണ് ഉംലിംഗ് ലാ പാസ് നിർമ്മിച്ചത്. മൈനസ് 20 ഡിഗ്രിവരെ തണുപ്പ്, മണിക്കൂറിൽ 80 കിലോമീറ്റർ വരെ വേഗത്തിൽ വീശുന്ന തണുപ്പൻ കാറ്റ്, താണ്ടാൻ പ്രയാസമുള്ള റോഡ് എന്നിങ്ങനെ വെല്ലുവിളികൾ നിറഞ്ഞതാണ് ഉംലിംഗ് ലാ പാസ്.
ബൈക്കിലും മറ്റും ലഡാക്കും ഹിമാലയവും കറങ്ങുന്ന ക്രൂസർമാരുടെ ഇഷ്‌ടകേന്ദമാണ് ഉംലിംഗ് ലാ പാസ്. ഉറൂസിന് കരുത്തുറ്റ 4-ലിറ്റർ, ട്വിൻടർബോ, വി8 എൻജിനാണുള്ളത്. പൂജ്യത്തിൽ നിന്ന് 100 കിലോമീറ്റർ വേഗം നേടാൻ 3.6 സെക്കൻഡ് മതി. ടോപ് സ്‌പീഡ് 305 കിലോമീറ്റർ. എൻജിന്റെ കരുത്ത് 641 എച്ച്.പി. ടോർക്ക് 850 എൻ.എം. ₹3 കോടിയാണ് എക്‌സ്‌ഷോറൂം വില.