ന്യൂഡൽഹി: റിസർവ് ബാങ്ക് ഗവർണർ ശക്തികാന്ത ദാസിന്റെ കാലാവധി മൂന്ന് വർഷത്തേക്ക് കൂടി നീട്ടി. 2021 ഡിസംബർ 10 മുതൽ മൂന്ന് വർഷത്തേക്കോ, മറ്റ് ഉത്തരവുകൾ വരുന്നതുവരെയോ ആർ ബി ഐ ഗവർണറായി ശക്തികാന്ത ദാസിന് തുടരാൻ കേന്ദ്ര മന്ത്രിസഭയുടെ നിയമന സമിതി അനുമതി നൽകി.

Centre extends RBI Governor Shaktikanta Das' term for three years

Read @ANI Story | https://t.co/0FNF4qLd1U#RBI #RBIGovernor pic.twitter.com/WfDC1pZDiP

— ANI Digital (@ani_digital) October 29, 2021

ശക്തികാന്ത ദാസ് മുൻപ് ധനമന്ത്രാലയത്തിലെ സാമ്പത്തികകാര്യ വകുപ്പ് സെക്രട്ടറിയായിരുന്നു. 2018 ഡിസംബർ 11 നാണ് അദ്ദേഹത്തെ മൂന്ന് വർഷത്തേക്ക് റിസർവ് ബാങ്ക് ഗവർണറായി നിയമിച്ചത്. മൂന്ന് വർഷം കൂടി കാലാവധി നീട്ടിയതോടെ 2024 ഡിസംബർ വരെ ഈ സ്ഥാനത്ത് തുടരും.

ലോക ബാങ്ക്, ഏഷ്യൻ ഡെവലപ്മെന്റ് ബാങ്ക്, ഏഷ്യൻ ഇൻഫ്രാസ്ട്രക്ചർ ഇൻവെസ്റ്റ്മെന്റ് ബാങ്ക് എന്നിവിടങ്ങളിലും അദ്ദേഹം സേവനമനുഷ്ഠിച്ചിട്ടുണ്ട്. ധനമന്ത്രാലയത്തിലെ ദീർഘകാലത്തെ സേവനത്തിനിടയിൽ എട്ടോളം കേന്ദ്ര ബഡ്ജറ്റുകൾ തയ്യാറാക്കുന്നതുമായി അദ്ദേഹം നേരിട്ട് ബന്ധപ്പെട്ടിരുന്നു.

ബി ജെ പി സർക്കാർ കാലാവധി നീട്ടുന്ന ആദ്യത്തെ ഗവർണറാണ് അദ്ദേഹം. ഡൽഹി സർവകലാശാലയിലെ സെന്റ് സ്റ്റീഫൻസ് കോളേജിൽ നിന്നാണ് ശക്തികാന്ത ദാസ് ബിരുദാനന്തര ബിരുദം നേടിയത്.