ആലപ്പുഴ: കവർച്ച ശ്രമം തടയുന്നതിനിടെ സ്കൂട്ടറിൽ നിന്ന് വീണ് വനിതാ പൊലീസ് ഉദ്യോഗസ്ഥയ്ക്ക് പരിക്കേറ്റു. ആലപ്പുഴ ചേർത്തലയിൽ പട്ടണക്കാട് പൊലീസ് സ്റ്റേഷനിലെ സീനിയ‌ർ സിവിൽ പൊലീസ് ഓഫീസ‌ർ അജിത കുമാരിയ്ക്ക് നേരെയാണ് അതിക്രമമുണ്ടായത്. ജോലി കഴിഞ്ഞ് സ്കൂട്ടറിൽ വീട്ടിലേയ്ക്ക് മടങ്ങുന്നതിനിടെ ഹെൽമറ്റ് ധരിച്ചെത്തിയ രണ്ട് പേർ മാല പൊട്ടിക്കാൻ ശ്രമിക്കുകയായിരുന്നു.
പച്ചക്കറി വാങ്ങുന്നതിനായി കടയ്ക്ക് സമീപത്ത് നിർത്താൻ വാഹനത്തിന്റെ വേഗത കുറച്ചപ്പോഴാണ് മാല കവരാൻ ഇവർ ശ്രമിച്ചത്. അക്രമികളെ ചെറുക്കാനുള്ള ശ്രമത്തിനിടെ അജിത കുമാരി സ്കൂട്ടറിൽ നിന്ന് നിലത്ത് വീഴുകയും കാലിന് പരിക്കേൽക്കുകയും ചെയ്തു. തുടർന്ന് ചേർത്തല താലൂക്ക് ആശുപത്രിയിൽ ചികിത്സ തേടി. വാഹനത്തിൽ നിന്നും താഴേയ്ക്ക് വീണതിനാൽ അക്രമികളുടെ വാഹനത്തിന്റെ നമ്പർ ശ്രദ്ധിക്കാൻ കഴിഞ്ഞിരുന്നില്ല.
കോട്ടയം ചങ്ങനാശേരിയിലും സമാന സംഭവമുണ്ടായി. ജോലി കഴിഞ്ഞ് വീട്ടിലേയ്ക്ക് സ്കൂട്ടറിൽ പോകുകയായിരുന്ന വനിതാ പൊലീസ് ഉദ്യോഗസ്ഥയെ തടഞ്ഞുനിർത്തി ബ്രേസ്ലെറ്റ് കവരാൻ ശ്രമിച്ചു. തൃക്കൊടിത്താനം പൊലീസ് സ്റ്റേഷനിൽ നിന്നും ഡ്യൂട്ടി കഴിഞ്ഞ് കറുകച്ചാലിലെ വീട്ടിലേയ്ക്ക് മടങ്ങുകയായിരുന്ന ദീപ്തിയ്ക്ക് നേരെയാണ് കവർചാശ്രമമുണ്ടായത്. ആഭരണം മോഷ്ടിക്കാൻ ശ്രമിച്ച കൈലാത്തുപടി മൂലമുറിയിൽ സിറിയക്(33) അറസ്റ്റിലായി. എസ്എച്ച്ഒഇ അജീബ്, എസ്ഐ അനില്‍കുമാര്‍, എഎസ്ഐമാരായ ഗിരീഷ്, ചന്ദ്രകുമാര്‍, സാബു എന്നിവരുടെ നേതൃത്വത്തിലായിരുന്നു അറസ്റ്റ്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.