തിരുവനന്തപുരം: തിരുവനന്തപുരത്ത് ക്യാമ്പസ് ഫ്രണ്ട് നടത്തിയ പ്രതിഷേധ മാർച്ചിനെതിരെ ഉത്തർപ്രദേശ് പൊലീസ് കേസെടുത്തു. യുപി മുഖ്യമന്ത്രി യോഗി ആദിത്യനാഥിന്റെ വേഷത്തിലെത്തിയ ആളിനെ റോഡിലൂടെ കെട്ടിവലിക്കുന്നതായി അവതരിപ്പിച്ചതിനാണ് പൊലീസ് കേസെടുത്തത്. ട്വിറ്ററിൽ വൈറലായ ഇതിന്റെ ദൃശ്യങ്ങൾ കണ്ട ലഖ്നൗ സ്വദേശികളായ രണ്ട് പേരാണ് പൊലീസിൽ പരാതി നൽകിയത്. ലഖ്നൗ സൈബർ പൊലീസ് വിഷയത്തിൽ കേസെടുത്തു.

സംഭവം നടന്നത് കേരളത്തിലായതിനാൽ യുപി പൊലീസിന് നേരിട്ട് കേസെടുക്കാൻ സാധിക്കില്ല. അതിനാൽ ദൃശ്യങ്ങൾ സമൂഹ മാദ്ധ്യമങ്ങളിൽ പ്രചരിപ്പിച്ച് സാമുദായിക സ്പർദ്ധയുണ്ടാക്കാൻ ശ്രമമെന്നടക്കമുള്ള വകുപ്പുകൾ ചുമത്തി സൈബർ പൊലീസാണ് കേസെടുത്തത്.

കണ്ടാലറിയുന്ന ചിലർക്കെതിരെയാണ് കേസെടുത്തിരിക്കുന്നത്. പ്രതികളുടെ പേര് രേഖപ്പെടുത്തിയിട്ടില്ല. കേസിൽ അന്വേഷണം തുടങ്ങിയെന്ന് ലഖ്നൗ പൊലീസ് വ്യക്തമാക്കി. അന്വേഷണത്തിന്റെ ഭാഗമായി തിരുവനന്തപുരത്ത് കേരളാ പൊലീസുമായി ബന്ധപ്പെടുമെന്നും അറിയിച്ചു.