മലപ്പുറം : നിർമ്മാണ മേഖലയിലെ സാമഗ്രികളുടെ വിലക്കയറ്റം ഉപഭോക്താക്കൾക്കൊപ്പം വ്യാപാരികളെയും കരാറുകാരെയും പ്രതിസന്ധിയിലാക്കുന്നു. ലോക്ക്ഡൗൺ പ്രതിസന്ധിയിൽ നിന്നും കരകയറി തുടങ്ങുന്ന വേളയിലാണ് സാമഗ്രികളുടെ വിലവർദ്ധനവ് കാരണം വീണ്ടും പ്രതിസന്ധിയിലേക്ക് നീങ്ങുന്നത്. കഴിഞ്ഞ രണ്ടുമാസം മുമ്പ് വരെ 340 രൂപയായിരുന്നു സിമന്റിന്റെ വില. ബ്രാന്റഡ് കമ്പനികളുടേതിന് ചാക്കിന് 380ഉം. ഒരു മാസം കൊണ്ട് ഇവ യഥാക്രമം 440ഉം 470ഉം രൂപയായി. വിലക്കയറ്റം കാരണം നിർമ്മാണത്തിലിരിക്കുന്ന വീടുകളുടെയടക്കം തുടർ പ്രവൃത്തികൾ പലയിടങ്ങളിലും നിറുത്തിവച്ചിരിക്കുകയാണ്. കെട്ടിട നിർമ്മാണത്തിന് അടിസ്ഥാനമായി വേണ്ട കരിങ്കല്ലിന് 2100ൽ നിന്നും 3300 രൂപയായി വർദ്ധിച്ചു. ഒറ്റയടിക്ക് വർദ്ധിച്ചത് 1200 രൂപ. വയറിംഗ് സാമഗ്രികൾക്ക് 45 ശതമാനം വില കൂടി.

ദിവസവും വർദ്ധിക്കുന്ന ഇന്ധനവിലയാണ് നിർമ്മാണ സാധനങ്ങൾക്ക് വില കൂടാൻ കാരണമായി പറയുന്നത്. ഇന്ധന വില വർദ്ധനവ് മൂലം ക്രഷർ യൂണിറ്റുകൾക്ക് വില കൂട്ടേണ്ടി വന്നു. ഹോൾസെയിലിൽ സാധനങ്ങൾക്ക് വില വർദ്ധിച്ചതോടെ റീട്ടെയിൽ മേഖലക്കാരും പ്രതിസന്ധിയിലായി. വില കൂടിയ സാഹചര്യത്തിൽ കരാറുകാർ പുതിയ പ്രവ‌ൃത്തികൾ ആരംഭിക്കുന്നതും പരിമിതമാണ്. റീട്ടെയിൽ കടകളിൽ നേരത്തെ എടുത്തുവച്ച സിമന്റും മറ്റും കെട്ടിക്കിടക്കുന്ന അവസ്ഥയുമുണ്ട്. ഓർ‌ഡറുകൾക്ക് അനുസരിച്ചാണ് സ്റ്റോക്ക് എടുത്തതെന്നത് മാത്രം ആശ്വാസം. എന്നാൽ മറ്റു സംസ്ഥാനങ്ങളിൽ കാര്യമായ വില വർദ്ധനവില്ലെന്നുംകേരളത്തിൽ മാത്രമാണ് ഇത്തരത്തിൽ വില വർദ്ധനവെന്നുമുള്ള ആക്ഷേപവും ഉയരുന്നു.

കീശ കാലിയാവും

നിർമ്മാണ മേഖലയിലെ വില വർദ്ധനവ് സാധാരണക്കാരെയാണ് വലിയ രീതിയിൽ ബാധിക്കുന്നത്.

ചെറിയ ബഡ്ജറ്റിൽ വീട് നിർമ്മിക്കാൻ ഉദ്ദേശിച്ചവർക്ക് ചെലവ് താങ്ങാനാവില്ല

നിർമ്മാണ തൊഴിലാളികളുടെ മിനിമം വേതനം ആയിരം രൂപയാണ്. സാമഗ്രികളുടെ വിലയോടൊപ്പം ഇത്തരം ചെലവുകളും വഹിക്കേണ്ടി വരുന്നതോടെ വില കുറയാൻ കാത്തിരിക്കുകയാണ് പലരും

ലൈഫ് പദ്ധതിയുടെ പണികളും മുടങ്ങും

നാല് ലക്ഷം രൂപയാണ് ലൈഫ് പദ്ധതിയിൽ വീടുകൾക്കായി അനുവദിക്കുന്നത്.

പണി നടക്കുന്ന നാല് ഘട്ടങ്ങളിലായാണ് തുക നൽകുക.

സാമഗ്രികളുടെ വില കൂടിയ സാഹചര്യത്തിൽ നാല് ലക്ഷം രൂപയിൽ വീട് നിർമ്മിക്കാനാവില്ല. ഈ അവസ്ഥയിൽ നിർമ്മാണ പ്രവൃത്തികൾ മുടങ്ങിപ്പോവാനുള്ള സാദ്ധ്യതകളുമുണ്ട്.

കഴിഞ്ഞ മാസത്തെ വില

സിമന്റ് : 380 രൂപ

കമ്പി : 55 രൂപ (കിലോ)

കരിങ്കല്ല് : 2100

ഒക്ടോബറിലെ വില

സിമന്റ് : 470 രൂപ

കമ്പി : 75 രൂപ (കിലോയ്ക്)

കരിങ്കല്ല് : 3300 രൂപ