പാലക്കാട്: ജില്ലയിലെ 23 ഗ്രാമപഞ്ചായത്തുകൾക്ക് ഒ.ഡി.എഫ് പ്ലസ് പദവി. ഖര - ദ്രവ മാലിന്യ സംസ്‌കരണത്തിൽ മികച്ച സംവിധാനങ്ങളൊരുക്കി ഗ്രാമീണമേഖലയിൽ വൃത്തിയുള്ള പൊതുയിടങ്ങൾ ഒരുക്കിയ ശ്രീകൃഷ്ണപുരം, വെള്ളിനേഴി, കാരാകുറിശ്ശി, കരിമ്പുഴ, കടമ്പഴിപ്പുറം, പൂക്കോട്ടുകാവ്, പെരുവെമ്പ്, നെന്മാറ, പല്ലശ്ശന, അകത്തേത്തറ, പുതുപ്പരിയാരം, കൊടുമ്പ്, ആലത്തൂർ, കാഞ്ഞിരപ്പുഴ, കുമരംപുത്തൂർ, തച്ചമ്പാറ, കോട്ടോപ്പാടം, മണ്ണൂർ, മുണ്ടൂർ, നല്ലേപ്പിള്ളി, മുതുതല, കപ്പൂർ, പെരുമാട്ടി പഞ്ചായത്തുകൾക്കാണ് ഒ.ഡി.എഫ് പ്ലസ് പദവി ലഭിച്ചത്.
ശ്രീകൃഷ്ണപുരം ബ്ലോക്ക് പരിധിയിലെ ആറ് പഞ്ചായത്തുകൾ ഒ.ഡി.എഫ് പ്ലസ് പദവി കരസ്ഥമാക്കിയതിനാൽ ശ്രീകൃഷ്ണപുരം ബ്ലോക്ക് പഞ്ചായത്ത് ജില്ലയിലെ ആദ്യത്തെ ഒ.ഡി.എഫ് ബ്ലോക്ക് പഞ്ചായത്തായി പ്രഖ്യാപിച്ചു. ഒ.ഡി.എഫ് പ്ലസ് പ്രഖ്യാപനത്തിന്റെ മുന്നോടിയായി ജില്ലാ ശുചിത്വ ഹരിത കേരളം മിഷന്റെയുംനേതൃത്വത്തിൽ ഗ്രാമപഞ്ചായത്തുകളുമായി ചേർന്ന് വിവിധ പരിപാടികൾ ആവിഷ്‌കരിച്ച് നടപ്പിലാക്കിയിരുന്നു. മൊബൈൽ ആപ്ലിക്കേഷൻ ഉപയോഗിച്ച് വില്ലേജ് തലത്തിൽ ഖര ദ്രവ മാലിന്യ സംസ്‌കരണ സംവിധാനങ്ങളിൽ ജിയോ ടാഗിംഗും സർവ്വെയും നടത്തിയതിന്റെ ഭാഗമായി തിരഞ്ഞെടുത്ത ഗ്രാമപഞ്ചായത്തുകളിലാണ് ആദ്യഘട്ട പ്രഖ്യാപനം നടത്തിയത്.
ജില്ലയിലെ എല്ലാ ഗ്രാമപഞ്ചായത്തുകളെയും 2022 മാർച്ച് 31 നകം സമ്പൂർണ ഒ.ഡി.എഫ് പ്ലസ് പദവിയിലേക്ക് എത്തിക്കുകയാണ് ലക്ഷ്യം
- ടി.ജി. അഭിജിത്ത്, ശുചിത്വമിഷൻ കോ- ഓർഡിനേറ്റർ
മാനദണ്ഡങ്ങൾ
എല്ലാ വീടുകളിലും ഉപയോഗ്യമായ ശൗചാലയങ്ങൾ ഉറപ്പാക്കുക
പൊതുയിടങ്ങൾ വൃത്തിയുള്ളതും മലിനജലംപ്ലാസ്റ്റിക് കൂമ്പാരങ്ങൾ ഇല്ലാതെ സംരക്ഷിക്കുക
സ്‌കൂളുകൾ, വീടുകൾ, അങ്കണവാടികൾ, മറ്റു പൊതുസ്ഥാപനങ്ങൾ എന്നിവിടങ്ങളിൽ ജൈവ - അജൈവ ദ്രവ മാലിന്യങ്ങൾ സംസ്‌കരിക്കുന്നതിന് സൗകര്യങ്ങൾ ഒരുക്കുക
വില്ലേജ് തലത്തിൽ പ്ലാസ്റ്റിക് തരംതിരിക്കുന്നതിനും ശേഖരിക്കുന്നതിനും മെറ്റീരിയൽ കളക്ഷൻ ഫെസിലിറ്റികൾ (എം.സി.എഫ്) സംവിധാനം ഒരുക്കുക
കമ്മ്യൂണിറ്റി കമ്പോസ്റ്റിംഗ് സംവിധാനങ്ങൾ ഒരുക്കുക
ഹരിതകർമ്മസേനയുടെ വാതിൽപ്പടിസേവനം ലഭ്യമാക്കുക