മണ്ണാർക്കാട്: കേരളാ പി.എസ്.സി മുഖേനയുള്ള വിവിധ ഉദ്യോഗ നിയമനങ്ങൾക്ക് അപേക്ഷ സമർപ്പിക്കുന്നതിനായി കോട്ടോപ്പാടം പഞ്ചായത്ത് പരിധിയിലെ അഭ്യസ്തവിദ്യരായ യുവജനങ്ങൾക്കായി കോട്ടോപ്പാടം ഗൈഡൻസ് ആൻ‌ഡ് അസിസ്റ്റന്റ്സ് ടീം ഫൊർ എംപവറിംഗ് സൊസൈറ്റി (ഗേറ്റ്സ്)യുടെ നേതൃത്വത്തിൽ സൗജന്യ വൺ ടൈം രജിസ്‌ട്രേഷൻ ക്യാമ്പ് സംഘടിപ്പിച്ചു.
പഞ്ചായത്ത് അംഗം കെ.ടി.അബ്ദുള്ള ഉദ്ഘാടനം ചെയ്തു. ഗേറ്റ്സ് പ്രസിഡന്റ് ഹമീദ് കൊമ്പത്ത് അദ്ധ്യക്ഷനായി. ജനറൽ സെക്രട്ടറി അസീസ് കോട്ടോപ്പാടം, എംപ്ലോയ്‌മെന്റ് ഡെസ്‌ക് കൺവീനർ എം. മുഹമ്മദാലി, എം.പി. സാദിഖ്, സലീം, സിദ്ദീഖ് എന്നിവർ സംസാരിച്ചു. നൂറോളം ഉദ്യോഗാർത്ഥികൾ രജിസ്റ്റർ ചെയ്ത ദ്വിദിന ക്യാമ്പിന് കെ.എ. ഹുസ്നി മുബാറക്, എ.കെ. കുഞ്ഞയമു, കെ. മൊയ്തുട്ടി എന്നിവർ നേതൃത്വം നൽകി. പി.എസ്.സിയുടെ വിവിധ പരീക്ഷകൾക്ക് തയ്യാറെടുക്കുന്ന ഉദ്യോഗാർത്ഥികൾക്കായി നവംബർ മൂന്നാംവാരം മുതൽ സമഗ്ര പരിശീലനവും ഗേറ്റ്സിന്റെ ആഭിമുഖ്യത്തിൽ സംഘടിപ്പിക്കും.