മല്ലപ്പള്ളി: ശാസ്താം കോയിക്കൽ -മുരണി റോഡ് തകർന്നു. മല്ലപ്പള്ളിയിൽ നിന്ന് വായ്പ്പൂര്,​ ചുങ്കപ്പാറ എരുമേലി ഭാഗങ്ങളിലേക്ക് പോകാൻ എളുപ്പമാർഗമാണ് ഈ റൂട്ട്. ടോറസ് വാഹനങ്ങളുടെ അമിത പാച്ചിലാണ് റോഡ് തകരാൻ പ്രധാന കാരണം. രാത്രിയും,​ പുലർച്ചെയുമായി നിരവധി വാഹനങ്ങൾ ഈ റൂട്ടിൽ നിയന്ത്രണമില്ലാതെ പായുന്നതായും പരാതിയുണ്ട്. അറ്റകുറ്റപ്പണിക്ക് ഫണ്ട് അനുവദിച്ചെന്ന് പറയാൻ തുടങ്ങിയിട്ട് നാളുകളായെങ്കിലും ഇതുവരെ നടപടിയായിട്ടില്ല.

ഇരുചക്ര വാഹനങ്ങൾക്കോ ചെറു വാഹനങ്ങൾക്കോ ഈ റോഡ് ഉപയോഗിക്കാൻ കഴിയാത്ത അവസ്ഥയാണ്. എത്രയും പെട്ടന്ന് റോഡ് നവീകരിക്കാനുള്ള നടപടികൾ കൈക്കൊള്ളണമെന്നാണ് നാട്ടുകാരുടെ ആവശ്യം.