പത്തനംതിട്ട : ശ്രീചിത്തിര തിരുനാൾ ടൗൺഹാളിൽ സ്ഥാപിക്കുന്നതിനുള്ള പുതിയ കൽത്തൂണുകൾ എത്തിച്ചു. തമിഴ്‌നാട്ടിലെ മാർത്താണ്ഡത്തു നിന്നാണ് ഇവ എത്തിച്ചത്. ഇനി അതിഥികളെത്തുമ്പോൾ ഇവിടെ 16 കൽത്തൂണുകൾ തല ഉയർത്തി നിൽക്കും. കേരളീയ പാരമ്പര്യ ശൈലിയിൽ നിർമ്മിക്കപ്പെട്ട ടൗൺഹാൾ കെട്ടിടത്തിൽ തടിയാണ് ധാരാളമായി ഉപയോഗിച്ചിരുന്നത്. കാലപ്പഴക്കത്തിൽ ഇതിന് ബലക്ഷയം സംഭവിച്ചിരുന്നു. വരാന്തയിലെ മരത്തൂണുകൾക്ക് പകരം ഇനി കൽത്തൂണുകൾ സ്ഥാപിക്കും. മേൽക്കൂരയിലെ തടികൾക്ക് പകരം കൂടുതൽ കാലം ഈടുനിൽക്കുന്ന മികച്ച ഗുണനിലവാരമുള്ള ഗാൽവനൈസ്ഡ് അയൺ ആണ് ഉപയോഗിക്കുന്നത്. പ്രൊജക്ടർ, ഉച്ചഭാഷിണികൾ, ആധുനിക ശബ്ദ നിയന്ത്രണ സംവിധാനങ്ങൾ, എ.സി തുടങ്ങി ആധുനിക സംവിധാനങ്ങൾ ഒരുക്കുമെങ്കിലും പുറംഭിത്തി, ജനലുകൾ തുടങ്ങി നിലനിറുത്താവുന്ന എല്ലാ ഭാഗങ്ങളും സംരക്ഷിച്ചാണ് നവീകരണം. പൊളിച്ചിറക്കുന്ന ഭാഗങ്ങളും കേടുപാടുകളില്ലാതെ പരമാവധി സൂക്ഷിച്ചാണ് കൈകാര്യം ചെയ്യുന്നത്.