അടൂർ:സംസ്ഥാനത്തെ ആദ്യത്തെ സഹകരണ സീ ഫുഡ് ഹോട്ടൽ അടൂരിൽ ആരംഭിക്കുന്നു. സഹകരണ വകുപ്പ് ,ഫിഷറീസ് വകുപ്പുമായി ചേർന്നാണ് ഹോട്ടൽ ആരംഭിക്കുന്നത്. പറക്കോട് സർവീസ് സഹകരണ ബാങ്കിന്റെ നേതൃത്വത്തിലാണ് ഹോട്ടലിന്റെ പ്രവർത്തനം.കടൽ മത്സ്യങ്ങൾ ഉപയോഗിച്ചുള്ള വിവിധതരം ഭക്ഷണങ്ങൾ ഇവിടെ ലഭ്യമാകും. കായൽ മീനുകളും ലഭ്യമാകും. ശുദ്ധമായ ഭക്ഷണം ഉറപ്പുവരുത്തുന്നതിനായി വിവിധ സർക്കാർ ഏജൻസികളായ മത്സ്യഫെഡ്, കെപ്‌കോ ചിക്കൻ, മീറ്റ് പ്രോഡക്ട് ഒഫ് ഇന്ത്യ, ഹോർട്ടികോർപ്പ്, മിൽമ, അമൂൽ, വിവിധ സഹകരണ സംഘങ്ങൾ ഉത്പ്പാദിപ്പിക്കുന്ന എണ്ണ എന്നിവയുടെ ഉത്പ്പന്നങ്ങളാണ് ഹോട്ടലിൽ ഭക്ഷണം പാകം ചെയ്യാൻ ഉപയോഗിക്കുന്നത്. അടുത്തിടെയാണ് പറക്കോട് സർവീസ് സഹകരണ ബാങ്കിന്റെ നേതൃത്വത്തിൽ കേരളത്തിലെ ഏറ്റവും വലിയ സൂപ്പർ മാർക്കറ്റ് ആരംഭിച്ചത്. വെള്ളിയാഴ്ച വൈകിട്ട് അഞ്ചിന് മന്ത്രി സജി ചെറിയാൻ സീഫുഡ് ഹോട്ടൽ ഉദ്ഘാടനം ചെയ്യും. ഡെപ്യൂട്ടി സ്പീക്കർ ചിറ്റയം ഗോപകുമാർ ആദ്യവിൽപ്പന നിർവഹിക്കും. ബാങ്ക് പ്രസിഡന്റ് അഡ്വ. ജോസ് കളീക്കൽ അദ്ധ്യക്ഷതവഹിക്കും. അടൂർ ബൈപ്പാസിലാണ് കോ-ഓപ്പറേറ്റീവ് സീ ഫുഡ് ഹോട്ടൽ ആരംഭിക്കുന്നതെന്നും മറ്റ് ഹോട്ടലുകളിൽ നിന്ന് ലഭിക്കുന്നതിനേക്കാൾ കുറഞ്ഞനിരക്കിൽ മത്സ്യ വിഭവങ്ങൾ ലഭ്യമാകുമെന്നും ബാങ്ക് പ്രസിഡന്റ് അഡ്വ.ജോസ് കളീക്കൽ, വൈസ് പ്രസിഡന്റ് പി.വി. രാജേഷ്, ഭരണ സമിതിയംഗം ഇ.എ. റഹിം, സെക്രട്ടറി ജി.എസ് .രാജശ്രീ എന്നിവർ പത്രസമ്മേളനത്തിൽ പറഞ്ഞു.