റാന്നി :താലൂക്ക് ആശുപത്രി. രോഗീ സൗഹൃദ ആശുപത്രിയാകുന്നതിന്റെ ഭാഗമായി ആർദ്രം പദ്ധതിയിൽ ഉൾപ്പെടുത്തി 93 ലക്ഷം രൂപ അനുവദിച്ചതായി അഡ്വ. പ്രമോദ് നാരായൺ എം.എൽ.എ അറിയിച്ചു. എൻ.എച്ച് .എം മുഖേന ഒ. പി വിഭാഗത്തിന്റെ നവീകരണമാണ് പദ്ധതിയിലൂടെ ലക്ഷ്യമിടുന്നത് .
ഒ. പി കൗണ്ടറിലെ തിരക്ക് ഒഴിവാക്കുന്നതിന്റെ ഭാഗമായി ടോക്കൺ സൗകര്യം ഏർപ്പെടുത്തുന്നതിനൊപ്പം പ്രൈമറി സെക്കൻഡറി വിഭാഗത്തിലായി 2 കാത്തിരിപ്പ് കേന്ദ്രങ്ങളും നിർമ്മിക്കും. ഒ. പി വിഭാഗത്തിൽ എത്തുന്ന രോഗികളുടെ പരിശോധനയ്ക്ക് സ്വകാര്യത ഉറപ്പാക്കും. പുതിയ ലാബും ഫാർമസി സൗകര്യവും ഏർപ്പെടുത്തുന്നതിന് പുറമേ ഇവിടെ എത്തുന്നവർക്ക് പ്രത്യേക കാത്തിരിപ്പ് കേന്ദ്രവും സജ്ജീകരിക്കും. പുതിയ ടോയ്‌ലറ്റ് ബ്ലോക്ക് നിർമ്മിക്കും.ഒ.പി വിഭാഗം ചായംപൂശി മനോഹരമാക്കും. കേരള സംസ്ഥാന ഹൗസിംഗ് ബോർഡിനാണ് നിർമ്മാണ ചുമതല.