തിരുവല്ല: കനത്തമഴയും വെള്ളപ്പൊക്കവും കാരണം ഉപദേശിക്കടവ് പാലത്തിന്റെ നിർമ്മാണം വൈകുന്നു. കടപ്ര, പരുമല പ്രദേശങ്ങളെ ബന്ധിപ്പിക്കാനായി പമ്പാനദിയുടെ കുറുകെ ഉപദേശിക്കടവിൽ ആരംഭിച്ച പാലം പണി ഒരു വർഷം പിന്നിടുന്നു. 2020 സെപ്തംബർ 17ന് മുഖ്യമന്ത്രി പിണറായി വിജയനാണ് ശിലാസ്ഥാപനം നടത്തിയത്. ആറുമാസത്തെ പണികൾ മാത്രമേ നടന്നുള്ളൂ. പിന്നീട് മേയ് മുതൽ തുടരുന്ന മഴയും വെള്ളപ്പൊക്കവുമാണ് തടസമായത്. അപ്രോച്ച് റോഡിലെ സ്പാനിന്റെ പണികളാണ് കുറച്ചെങ്കിലും നടത്താനായത്. പാലത്തിൽ നിന്ന് വളഞ്ഞവട്ടം ഭാഗത്തേക്ക് മൂന്ന് ലാൻഡ് സ്പാനുകളിൽ 50 മീറ്ററും പരുമല ഭാഗത്തേക്ക് ഏഴ് ലാൻഡ് സ്പാനുകളിൽ 2.1 കിലോമീറ്റർ ദൂരത്തിലുമാണ് സമീപ പാത നിർമ്മിക്കുന്നത്. പൈലുകൾ സ്ഥാപിച്ചാണ് പാലം പണിയുന്നത്. പാലം നിർമ്മാണം, സമീപ പാതകളുടെ നിർമ്മാണം, ഇരുവശങ്ങളിലും സംരക്ഷണ ഭിത്തി കെട്ടുക, വൈദ്യുതി പോസ്റ്റുകൾ മാറ്റി സ്ഥാപിക്കുക, ഭൂമി ഏറ്റെടുക്കൽ, ജല അതോറിട്ടിയുടെ പൈപ്പ് ലൈനുകൾ മാറ്റിസ്ഥാപിക്കുക തുടങ്ങി മുഴുവൻ ജോലികളും പദ്ധതിയിൽ ഉൾപ്പെടുത്തിയിട്ടുണ്ട്. മാത്യു കോര ആൻഡ് കമ്പനിയാണ് കരാർ ഏറ്റെടുത്തിരിക്കുന്നത്. കരാർ കാലാവധി ഒന്നര വർഷമാണ്. ഒരുവർഷം പിന്നിട്ടെങ്കിലും പകുതിപോലും പണികൾ പൂർത്തിയായിട്ടില്ല. കാലാവസ്ഥ അനുകൂലമായില്ലെങ്കിൽ കരാർ കാലാവധിക്കുള്ളിൽ പണികൾ പൂർത്തിയാക്കാൻ സാധിക്കില്ലെന്ന് അധികൃതർ പറഞ്ഞു.

പാലം വന്നാൽ കടപ്ര ഒന്നിക്കും

കടപ്ര പഞ്ചായത്തിൽ 15 വാർഡുകളുണ്ട്. ഇതിലെ അഞ്ചുമുതൽ ഒമ്പത് വരെയുള്ള അഞ്ചു വാർഡുകൾ നദിയുടെ പരുമലഭാഗത്തെ കരയിലും, ബാക്കി 10 വാർഡുകൾ മറുകരയിലുമാണ് . അഞ്ച് വാർഡിലുള്ളവർക്ക് കടപ്ര പഞ്ചായത്ത് ആസ്ഥാനത്ത് എത്തണമെങ്കിൽ ആലപ്പുഴ ജില്ലയിലെ മാന്നാർ കടക്കണം. കാൽനൂറ്റാണ്ടിന്റെ കാത്തിരിപ്പിനുശേഷം പാലം വരുന്നതോടെ കുറ്റൂർ,പ്രാവിൻകൂട്, കല്ലുങ്കൽ,വെൺപാല,തുകലശേരി പ്രദേശത്തുനിന്ന് ടൗണിലെ തിരക്കിൽപ്പെടാതെ ഏറ്റവും വേഗത്തിൽ പരുമലയിലെത്താവുന്ന വഴിയായി മാറും. അഞ്ചു കിലോമീറ്ററോളം ദൂരം കുറയുകയും ചെയ്യും. ഇവിടെ നിന്നുള്ളവർക്ക് തിരുവല്ല നഗരവുമായി വേഗത്തിൽ ബന്ധപ്പെടാനുമാവും. ഗതാഗത തടസമുണ്ടായാൽ തിരുവല്ല-മാന്നാർ സമാന്തര പാതയായും ഈവഴി ഉപയോഗിക്കാനാവും. പരുമല പള്ളി, പനയന്നാർക്കാവ് എന്നിവിടങ്ങിലേക്കുള്ള തീർത്ഥാടകർക്കും, പരുമല ആശുപത്രിയിലേക്കു വരുന്ന രോഗികൾക്കും പരുമല ദേവസ്വംബോർഡ് കോളേജിലെ വിദ്യാർത്ഥികൾക്കും ഉപദേശിക്കടവ് പാലം പുതിയ വഴിതുറക്കും.

ഉപദേശിക്കടവ് പാലം

-----------------

ചെലവ് - 23.73 കോടി

നീളം -271.50 മീറ്റർ

വീതി- 11മീറ്റർ

നടപ്പാതയുടെ വീതി 1.5 മീറ്റർ