കൊല്ലം: കൊട്ടാരക്കര വിലങ്ങറയിൽ ഒരു കുടുംബത്തിലെ നാലുപേരെ അവശനിലയിൽ കണ്ടെത്തി.വിലങ്ങറ ചരുവിള പുത്തൻവീട്ടിൽ സുദർശനൻ(45), ഭാര്യ ഗീതാകുമാരി(39), മക്കൾ നീതു(18), നിതീഷ്(13) എന്നിവരെയാണ് അവശനിലയിൽ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചത്. വിഷം ഉള്ളിൽച്ചെന്നതായി സംശയിക്കുന്നു. അപകടാവസ്ഥയില്ലെന്ന് ആശുപത്രി അധികൃതർ അറിയിച്ചു. ഇന്നലെ വൈകിട്ട് മൂന്നുമണിയോടെയാണ് സംഭവം. അഡ്മിഷനുമായി ബന്ധപ്പെട്ട് ഗീതാകുമാരിയും നീതുവും ഐ.ടി.ഐയിൽ പോയിരുന്നു. ഇവർ തിരികെയെത്തി അധികം വൈകാതെ നിതീഷിന് ശാരീരിക അസ്വസ്ഥതകളുണ്ടായി ഛർദ്ദിച്ചു. ഉടനെ നിതീഷിനെയും കൂട്ടി കൊട്ടാരക്കര താലൂക്ക് ആശുപത്രിയിൽ എത്തിയ ഗീതാകുമാരിയും അവശനിലയിലായി. തൊട്ടുപിന്നാലെ വീട്ടിലുണ്ടായിരുന്ന സുദർശനനും നീതുവും അവശരായതോടെയാണ് വിഷം ഉള്ളിൽ ചെന്നതായ സംശയം ഉടലെടുത്തത്. കഴിച്ച ആഹാരത്തിൽ നിന്ന് സംഭവിച്ചതാണോയെന്നും പരിശോധിക്കുന്നുണ്ട്. പൊലീസ് മൊഴിരേഖപ്പെടുത്താൻ ആശുപത്രിയിൽ എത്തിയെങ്കിലും തങ്ങൾ പ്രത്യേകിച്ച് ഒന്നും കഴിച്ചില്ലെന്നാണ് നാലുപേരും പറഞ്ഞത്. മേസ്ത്രി പണിക്കാരനായ സുദർശനന് ഹൃദയസംബന്ധമായ അസുഖത്തിന് ചികിത്സ കഴിഞ്ഞെത്തിയതാണ്. കൊട്ടാരക്കര പൊലീസ് അന്വേഷണം നടത്തുന്നുണ്ട്.