ഓച്ചിറ: നവോത്ഥാന നർത്തകൻ ഓച്ചിറ ശങ്കരൻകുട്ടി ഫൗണ്ടേഷന്റെ ആഭിമുഖ്യത്തിൽ സംഘടിപ്പിച്ച ഓച്ചിറ ശങ്കരൻകുട്ടി നൃത്തനാട്യ പുരസ്കാരങ്ങൾ വിതരണം ചെയ്തു. കേരള സംഗീത നാടക അക്കാഡമി മുൻ സെക്രട്ടറി രാജാ ശ്രീകുമാർ വർമ്മ യോഗം ഉദ്ഘാടനം ചെയ്തു. ഫൗണ്ടേഷൻ പ്രസിഡന്റ് ടി. ജെ. ഉണ്ണികൃഷ്ണൻ നമ്പൂതിരി അദ്ധ്യക്ഷനായി. ഓച്ചിറ ശങ്കരൻകുട്ടി നൃത്തനാട്യ വിഭൂഷൻ പുരസ്കാരം കോട്ടയം ഭവാനി ചെല്ലപ്പനും നൃത്തനാട്യ സപര്യ പുരസ്കാരം നടനഭൂഷണം ചിത്രാ മോഹനും നൃത്തനാട്യ യുവപ്രതിഭ പുരസ്കാരം ഭരതനാട്യം നർത്തകി ശ്രുതി ശ്രീകുമാറും ബാലപ്രതിഭ പുരസ്കാരം ബാല നർത്തകി ലക്ഷ്മിദേവി കാരൂരും ഏറ്റുവാങ്ങി. പുരസ്കാര സമർപ്പണം കലാമണ്ഡലം മാലിനി നായർ നിർവഹിച്ചു.
കഥകളി നിരൂപകൻ കുരുമ്പോലിൽ ശ്രീകുമാർ മുഖ്യ പ്രഭാഷണവും ജൈവ വൈവിദ്ധ്യ ബോർഡ് റിസോഴ്സ് പേഴ്സൺ പ്രൊഫ. പി. രാധാകൃഷ്ണക്കുറുപ്പ് അനുസ്മരണ പ്രഭാഷണവും നടത്തി. ഫൗണ്ടേഷൻ സെക്രട്ടറി സഞ്ചാർ ചന്ദ്രമോഹൻ പുരസ്കാര ജേതാക്കളെ പരിചയപ്പെടുത്തി. ഡോ. അശോക്ബാബു, ജയചന്ദ്രൻ തൊടിയൂർ, പോണാൽ നന്ദകുമാർ, മണപ്പള്ളി ഉണ്ണികൃഷ്ണൻ, സി. ആർ. പ്രഭ തുടങ്ങിയവർ സംസാരിച്ചു.