പുനലൂർ: കിഴക്കൻ മലയോര മേഖലയിൽ ഇന്നലെ മഴ കുറഞ്ഞതിനെ തുടർന്ന് തെന്മല പരപ്പാർ അണക്കെട്ടിന്റെ മൂന്ന് ഷട്ടറുകളും 1.40 മീറ്ററായി താഴ്ത്തി. ഞായറാഴ്ച സന്ധ്യയോടെ മൂന്ന് ഷട്ടറുകളും 1.60 മീറ്ററായി ഉയർത്തിയിരുന്നു. 115.82 മീറ്റർ സംഭരണ ശേഷിയുളള അണക്കെട്ടിൽ ജലനിരപ്പ് ഇന്നലെ 114.85 മീറ്ററായി താഴ്ന്ന പശ്ചാത്തലത്തിലാണ് ഷട്ടറുകളും താഴ്ത്തിയതെന്ന് കല്ലട ഇറിഗേഷൻ അസി. എൻജിനിയർ ശിവശങ്കരൻ നായർ അറിയിച്ചു. ഞായറാഴ്ച സന്ധ്യയോടെ മൂന്ന് ഷട്ടറുകളും 1.60 മീറ്ററായി ഉയർത്തിയതോടെ കല്ലടയാറ്റിലെ ജല നിരപ്പ് രാത്രിയിൽ ക്രമാതീതമായി ഉയർന്നു. ഇത് കാരണം പുനലൂർ കെ.എസ്.ആർ.ടി.സി യുടെ ഷോപ്പിംഗ് കോംപ്ലക്സ്, വെട്ടിപ്പുഴ, എം.എൽ.എ റോഡ്, പ്രണവം ആശുപത്രിയുടെ ഒന്നാം നില തുടങ്ങിയ നിരവധി പ്രദേശങ്ങളിൽ വെള്ളം കയറി.