കരുനാഗപ്പള്ളി: നവംബർ 1 ന് സ്കൂളുകൾ തുറക്കുന്നതിന്റെ ഭാഗമായി നഗരസഭയുടെ പരിധിയിൽ വരുന്ന വിദ്യാലയങ്ങളിൽ ശുചീകരണങ്ങൾക്ക് തുടക്കമായി. നഗരസഭാ അതിർത്തിയിലുള്ള 14 പൊതു വിദ്യാലയങ്ങളുടെ ശുചീകരണ പ്രവർത്തനങ്ങളാണ് ആരംഭിച്ചത്. നഗരസഭാ ശുചീകരണ വിഭാഗം തൊഴിലാളികൾ, തൊഴിലുറപ്പ് തൊഴിലാളികൾ എന്നിവരുടെ സഹകരണത്തോടെയാണ് ശുചീകരിക്കുന്ന പ്രവർത്തനം ആരംഭിച്ചത്. ശുചീകരണ പ്രവർത്തനങ്ങളുടെ ഉദ്ഘാടനം കരുനാഗപ്പള്ളി ഗവ. ഹയർ സെക്കൻഡറി സ്കൂളിൽ നഗരസഭാ ചെയർമാൻ കോട്ടയിൽ രാജു ഉദ്ഘാടനം ചെയ്തു. വിദ്യാഭ്യാസ സ്ഥിരം സമിതി ചെയർപേഴ്സൺ എൽ . ശ്രീലത അദ്ധ്യക്ഷയായി. നഗരസഭാ കൗൺസിലർ റെജി ഫോട്ടോപാർക്ക്, എസ് .എം .സി ചെയർമാൻ രഞ്ജിത്ത്, സോപാനം ശ്രീകുമാർ തുടങ്ങിയവർ പങ്കെടുത്തു. 22ന് ശുചീകരണ പ്രവർത്തനങ്ങൾ പൂർത്തിയാകുമെന്ന് നഗരസഭ അധികൃതർ അറിയിച്ചു.