കരുനാഗപ്പള്ളി : ആസാദി കാ അമൃത് മഹോത്സവത്തിന്റെ ഭാഗമായി നഗരസഭയുടെ നേതൃത്വത്തിൽ സംഘടിപ്പിച്ച മെഗാ ഫയൽ തീർപ്പാക്കൽ അദാലത്ത് മന്ത്രി പി. പ്രസാദ് ഉദ്ഘാടനം ചെയ്തു. സി. ആർ. മഹേഷ് എം.എൽ.എ അദ്ധ്യക്ഷനായി. നഗരസഭാ ചെയർമാൻ കോട്ടയിൽ രാജു സ്വാഗതം പറഞ്ഞു. സെക്രട്ടറി എ. ഫൈസൽ റിപ്പോർട്ട് അവതരിപ്പിച്ചു. വൈസ് ചെയർപേഴ്സൺ എ. സുനിമോൾ ,വിവിധ സ്ഥിരം സമിതി അദ്ധ്യക്ഷരായ എം. ശോഭന, ഡോ. പി. മീന, ഇന്ദുലേഖ, എൽ. ശ്രീലത, പടിപ്പുര ലത്തീഫ്, നഗരസഭാ കൗൺസിലർമാരായ എം .അൻസാർ, സതീഷ് വേനത്ത് എന്നിവർ സംസാരിച്ചു. ഇന്ന് മുതൽ വിവിധ വാർഡുകളിൽ നഗരസഭാ ചെയർമാൻ നേരിട്ടെത്തി പരാതി സ്വീകരിക്കും. ഒരു ദിവസം അഞ്ച് വാർഡുകളിൽ വീതം ഏഴു ദിവസം കൊണ്ട് അദാലത്ത് പൂർത്തിയാക്കും. വാർഡ് തലത്തിൽ നടക്കുന്ന അദാലത്തുകൾ വഴി ലഭിക്കുന്ന പരാതികൾ നവംബർ 5 മുതൽ നഗരസഭയിൽ നടക്കുന്ന മെഗാ അദാലത്തിൽ തീർപ്പാക്കും. നഗരസഭയിൽ അപേക്ഷ നൽകിയിട്ടും വിവിധ കാരണങ്ങളാൽ തീർപ്പാക്കാൻ കഴിയാത്ത ഫയലുകൾ സംബന്ധിച്ച അപേക്ഷകൾ പൊതുജനങ്ങൾ നഗരസഭാ ചെയർമാന് നേരിട്ട് നൽകാം.