ഗുരുവായൂർ: നഗരകാര്യ വകുപ്പ് ഉത്തരമേഖല ജോയിന്റ് ഡയറക്ടർ കെ.പി. വിനയൻ ഗുരുവായൂർ ദേവസ്വം അഡ്മിനിസ്‌ട്രേറ്ററാകും. ഇന്നലെ ചേർന്ന ദേവസ്വം ഭരണസമിതി യോഗമാണ് അഡ്മിനിസ്‌ട്രേറ്റർ സ്ഥാനത്തേയ്ക്ക് കെ.പി. വിനയനെ നിയമിക്കാനായി സർക്കാരിലേയ്ക്ക് ശുപാർശ ചെയ്യാൻ തീരുമാനിച്ചത്. സർക്കാർ നൽകിയ മൂന്നംഗ പാനലിൽ നിന്നാണ് ഭരണസമിതിയോഗം കെ.പി. വിനയനെ തീരുമാനിച്ചത്. സർക്കാരിന്റെ ഔദ്യോഗിക പ്രഖ്യാപനം വൈകാതെയുണ്ടാകും.
ഒരു വർഷത്തേയ്ക്ക് ഡെപ്യുട്ടേഷനിലാണ് നിയമനം. കോഴിക്കോട്, കൊച്ചി കോർപ്പറേഷനുകളിൽ സെക്രട്ടറിയായും നഗരകാര്യ വകുപ്പിൽ മദ്ധ്യമേഖല ജോയിന്റ് ഡയറക്ടറായും പ്രവർത്തിച്ചിട്ടുണ്ട്. കണ്ണൂർ പഴയങ്ങാടി അതിയടം പരേതനായ പി.വി നാരായണന്റേയും നളിനിയുടേയും മകനാണ്. കണ്ണൂർ ചെറുകുന്ന് ഗവ. ഹയർ സെക്കൻഡറി സ്‌കൂളിലെ അദ്ധ്യാപിക പി.വി. അനില ഭാര്യയും വിദ്യാർത്ഥികളായ ജയദേവൻ, അഞ്ജിത എന്നിവർ മക്കളുമാണ്. ദേവസ്വത്തിൽ അഡ്മിനിസ്‌ട്രേറ്ററായിരുന്ന ടി. ബ്രീജാകുമാരി വ്യാഴാഴ്ച്ച സർവീസിൽ നിന്നും വിരമിച്ചതിനെ തുടർന്നാണ് പുതിയ നിയമനം.