പാവറട്ടി: എളവള്ളി ഗ്രാമപഞ്ചായത്തിൽ പറയ്ക്കാട് ചേലൂർകുന്നിൽ ജൈവ വൈവിദ്ധ്യ പാർക്ക് സ്ഥാപിക്കുന്നതിന് അനുമതിയായി. പറക്കാട് ചേലൂർ കുന്നിൽ ആയുർവേദ ഡിസ്‌പെൻസറിയോട് ചേർന്നുള്ള 15 സെന്റ് സ്ഥലത്താണ് പാർക്ക് സ്ഥാപിക്കുന്നത്. 2020-21 വർഷത്തിൽ സംസ്ഥാന ജൈവവൈവിദ്ധ്യ ബോർഡിന്റെ കീഴിൽ 20 പഞ്ചായത്തുകളിലാണ് പാർക്ക് അനുവദിച്ചിട്ടുള്ളത്. ഇതിൽ തൃശൂർ ജില്ലയിലെ ഏക പഞ്ചായത്താണ് എളവള്ളി. 5 ലക്ഷം രൂപയാണ് പാർക്കിനായി വകയിരുത്തിയിട്ടുള്ളത്. പഴശ്ശി ഇക്കോ ടൂറിസം ആൻഡ് റൂറൽ ഡെവലപ്‌മെന്റ് സൊസൈറ്റിയ്ക്കാണ് നിർമ്മാണ ചുമതല.
പദ്ധതിയുടെ ഭാഗമായി ശലഭോദ്യാനം, വൈവിദ്ധ്യ സസ്യശേഖരം, റീഡിംഗ് ഏരിയ, ഇരിപ്പിടങ്ങൾ, ജൈവവേലി, നടപ്പാത, പ്രവേശനകവാടം, ഔഷധ സസ്യങ്ങൾ, പ്രകൃതി സൗഹൃദ ബാംബു പ്ലൈ ബോർഡുകൾ, പറവകൾക്ക് കുടിവെള്ള സൗകര്യം എന്നിവ ഒരുക്കും. കൂടാതെ നക്ഷത്രവൃക്ഷങ്ങൾ, ഫലവൃക്ഷങ്ങൾ, പൂമരങ്ങൾ, കുറ്റിച്ചെടികൾ എന്നിവയുമുണ്ടാകും. പഞ്ചായത്ത്തല ജൈവവൈവിദ്ധ്യ പരിപാലന സമിതിക്കാണ് പാർക്കിന്റെ സംരക്ഷണ ചുമതല നൽകിയിരിക്കുന്നത്. പ്രാദേശിക ടൂറിസം, പരിസ്ഥിതി സൗഹാർദ്ദ ബോധം എന്നിവ പൊതുജനങ്ങളിലും വിദ്യാർത്ഥികളിലും വളർത്തുന്നതിന് ജൈവവൈവിദ്ധ്യ പാർക്ക് കൊണ്ട് സാധിക്കുമെന്ന് എളവള്ളി ഗ്രാമ പഞ്ചായത്ത് പ്രസിഡണ്ട് ജിയോ ഫോക്‌സ്, ജൈവവൈവിധ്യ ബോർഡ് ജില്ലാ കോ-ഓർഡിനേറ്റർ ഫെബിൻ ഫ്രാൻസിസ് എന്നിവർ പറഞ്ഞു.