 സംസ്ഥാനതല ഉദ്ഘാടനം മന്ത്രി വീണാജോർജ് നിർവഹിച്ചു

തിരുവനന്തപുരം: യൂണിവേഴ്സൽ ഇമ്മ്യൂണൈസേഷൻ പരിപാടിയുടെ ഭാഗമായി പുതുതായി ഉൾപ്പെടുത്തിയ ന്യൂമോകോക്കൽ കോൺജുഗേറ്റ് വാക്‌സിൻ (പി.സി.വി) കുഞ്ഞുങ്ങൾക്ക് നൽകിത്തുടങ്ങി. വാക്‌സിനേഷന്റെ സംസ്ഥാനതല ഉദ്ഘാടനം തിരുവനന്തപുരം തൈക്കാട് സ്ത്രീകളുടെയും കുട്ടികളുടെയും ആശുപത്രിയിൽ മന്ത്രി വീണാജോർജ് നിർവഹിച്ചു. ജില്ലകളിൽ അടുത്ത വാക്‌സിനേഷൻ ദിനം മുതൽ ഈ വാക്‌സിൻ ലഭ്യമാകും. സ്‌ട്രെപ്‌റ്റോ കോക്കസ് ന്യുമോണിയ അഥവാ ന്യൂമോ കോക്കസ് എന്ന രോഗാണു പരത്തുന്ന ഒരുകൂട്ടം രോഗങ്ങളെയാണ് ന്യൂമോകോക്കൽ രോഗം എന്ന് വിളിക്കുന്നത്. ന്യൂമോകോക്കസ് ബാക്ടീരിയ മൂലമുണ്ടാകുന്ന ന്യൂമോണിയ, മെനിൻജൈറ്റിസ് എന്നിവയിൽ നിന്ന് കുഞ്ഞുങ്ങൾക്ക് സംരക്ഷണം നൽകുന്നതിന് ഈ വാക്‌സിൻ ഫലപ്രദമാണ്. ചെറിയ കുഞ്ഞുങ്ങളിൽ ഈ രോഗതീവ്രത കൂടുതലാണ്. കുഞ്ഞുങ്ങളുടെ മരണത്തിന് പോലും ഇത് കാരണമാക്കും. എല്ലാവരും കുഞ്ഞുങ്ങൾക്ക് വാക്‌സിൻ ഉറപ്പാക്കണമെന്നും മന്ത്രി കൂട്ടിച്ചേർത്തു. ഒന്നരമാസത്തെ ആദ്യ ഡോസിന് ശേഷം മൂന്നര മാസം, ഒൻപത് മാസം എന്നിങ്ങനെയാണ് വാക്‌സിൻ നൽകേണ്ടത്. മറ്റ് വാക്‌സിൻ എടുക്കുന്നതിനൊപ്പമാണ് ഇതും നൽകുന്നത്. 44,000 ഡോസ് വാക്സിൻ ഒരു മാസത്തേക്ക് ആവശ്യമാണെന്നാണ് പ്രതീക്ഷിക്കുന്നത്. ഈ മാസത്തേക്കാവശ്യമായ 55,000 ഡോസ് വാക്സിൻ ലഭ്യമായിട്ടുണ്ടെന്നും മന്ത്രി പറഞ്ഞു. ആരോഗ്യ വകുപ്പ് ഡയറക്ടർ ഡോ. വി.ആർ. രാജു, അഡിഷണൽ ഡയറക്ടർ ഡോ. പ്രീത, ഡെപ്യൂട്ടി ഡയറക്ടർ ഡോ.സന്ദീപ്, ഡി.എം.ഒ ഡോ. കെ.എസ്. ഷിനു, ഡി.പി.എം ഡോ. സുകേഷ്, ആശുപത്രി സൂപ്രണ്ട് ഡോ. പ്രീതി ജയിംസ്, ആർ.സി.എച്ച് ഓഫീസർ ഡോ. ദിവ്യ എന്നിവർ ചടങ്ങിൽ പങ്കെടുത്തു.