 അഞ്ച് ഗ്രാമപഞ്ചയത്തുകൾ ഒ.ഡി.എഫ് പ്ലസ് നിലവാരത്തിലേക്ക്

തിരുവനന്തപുരം: നെടുമങ്ങാട് ബ്ലോക്ക് പഞ്ചായത്തിനെ ഒ.ഡി.എഫ് പ്ലസ് (ഓപ്പൺ ഡിഫക്കേഷൻ ഫ്രീ പ്ലസ്) പഞ്ചായത്തായി പ്രഖ്യാപിച്ചു. ആനാട്, അരുവിക്കര, കരകുളം, പനവൂർ, വെമ്പായം എന്നീ ഗ്രാമപഞ്ചായത്തുകളെ ഒ.ഡി.എഫ് പ്ലസ് നിലവാരത്തിലേക്ക് ഉയർത്തിക്കൊണ്ടുള്ള പ്രഖ്യാപനവും ഗാന്ധി ജയന്തി ദിനാചരണത്തിന്റെ ഉദ്ഘാടനവും നവകേരളം കർമ്മ പദ്ധതി കോഓർഡിനേറ്റർ ഡോ. ടി.എൻ. സീമ നിർവഹിച്ചു.

എല്ലാ വീടുകളിലും ശൗചാലയം, ഗ്രാമപഞ്ചായത്തുകളിൽ പൊതുശൗചാലയം, സ്‌കൂൾ, അങ്കണവാടി, പഞ്ചായത്ത് എന്നിവിടങ്ങളിൽ സ്ത്രീകൾക്കും പുരുഷന്മാർക്കും പ്രത്യേക ശൗചാലയം, പൊതുസ്ഥലങ്ങൾ മാലിന്യമുക്തമാക്കൽ, വീടുകളിൽ ഖരദ്രവ മാലിന്യങ്ങൾ സംസ്‌കരിക്കുന്നതിനുള്ള സൗകര്യം, കമ്യൂണിറ്റി കമ്പോസ്റ്റിംഗ് സംവിധാനം, വീടുകളിൽ ഹരിത കർമസേനയുടെ വാതിൽപടി സേവനം എന്നിവയാണ് ഒ.ഡി.എഫ് പ്ലസ് നിലവാരത്തിലേക്ക് ഉയർത്തുന്നതിനുള്ള മാനദണ്ഡങ്ങൾ. മാനദണ്ഡങ്ങൾ പാലിക്കുന്നുണ്ടെന്ന് ഉറപ്പ് വരുത്തുന്നതിനായി വാർഡ്, പഞ്ചായത്ത് തലങ്ങളിൽ ഹരിതകർമസേന അംഗങ്ങൾ പരിശോധന നടത്തും. നെടുമങ്ങാട് ബ്ലോക്ക് പഞ്ചായത്തിലെ 'അതിജീവനം" ഹാളിൽ നടന്ന പരിപാടിയിൽ ബ്ലോക്ക് പഞ്ചായത്ത് പ്രസിഡന്റ് വി. അമ്പിളി, ആനാട് ഗ്രാമപഞ്ചായത്ത് പ്രസിഡന്റ് ഷൈലജ എസ്, അരുവിക്കര ഗ്രാമപഞ്ചായത്ത് പ്രസിഡന്റ് കളത്തറ മധു, പനവൂർ ഗ്രാമപഞ്ചായത്ത് പ്രസിഡന്റ് മിനി എസ്, കരകുളം ഗ്രാമപഞ്ചായത്ത് പ്രസിഡന്റ് ലേഖാറാണി യു, വെമ്പായം ഗ്രാമപഞ്ചായത്ത് പ്രസിഡന്റ് ബീന ജയൻ, ശുചിത്വ കേരളം ജില്ലാ കോഓർഡിനേറ്റർ , ഹരിത കേരളം മിഷൻ കോഓർഡിനേറ്റർ, ജനപ്രതിനിധികൾ തുടങ്ങിയവർ പങ്കെടുത്തു.