തിരുവനന്തപുരം: സംസ്ഥാനത്ത് ഞായറാഴ്ച വരെ ശക്തമായ മഴയ്ക്ക് സാദ്ധ്യത. മദ്ധ്യ തെക്കൻ ജില്ലകളിലാകും കൂടുതൽ മഴ ലഭിക്കുക. ബംഗാൾ ഉൾക്കടലിൽ തെക്കുപടിഞ്ഞാറ് മേഖലയിൽ രൂപപ്പെട്ട അന്തരീക്ഷച്ചുഴിയും തെക്കുകിഴക്കൻ അറബിക്കടലിൽ ലക്ഷദ്വീപിന് സമീപം രൂപപ്പെട്ട ചക്രവാതച്ചുഴിയുമാണ് സംസ്ഥാനത്ത് ഇടിയോട് കൂടിയ മഴയ്ക്ക് കാരണമാകുന്നത്. മലയോര മേഖലകളിൽ മണ്ണിടിച്ചിൽ, ഉരുൾപ്പൊട്ടൽ സാദ്ധ്യതയുള്ളതിനാൽ ജനങ്ങൾ ജാഗ്രത പാലിക്കണം. തിരുവനന്തപുരം, കൊല്ലം ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. കേരള തീരത്ത് ശക്തമായ കാറ്റിന് സാദ്ധ്യതയുള്ളതിനാൽ മത്സ്യബന്ധനം പാടില്ല.