തിരുവനന്തപുരം: അമൃത ടി.വി ഡെപ്യൂട്ടി ന്യൂസ്‌ എഡിറ്റർ സന്തോഷ് ബാലകൃഷ്ണൻ (46)അന്തരിച്ചു. ഹൃദയാഘാതത്തെ തുടർന്ന് ഇന്നലെ പുലർച്ചെ തിരുവനന്തപുരത്തെ സ്വകാര്യ ആശുപത്രിയിൽ ആയിരുന്നു അന്ത്യം. സൂര്യ ടിവിയിലൂടെ ദൃശ്യ മാദ്ധ്യമ രംഗത്ത് എത്തിയ സന്തോഷ് അ‍ഞ്ചുവർഷം മുൻപാണ് അമൃത ടിവി വാർത്താ വിഭാഗത്തിൽ എത്തിയത്.
കൊച്ചി കിഴക്കമ്പലം ഞാറല്ലൂർ പ്രതിഭയിൽ ബാലകൃഷ്ണൻ നായർ-വത്സല ദമ്പതികളുടെ മകനാണ്.
സംസ്‌കാരം ഇന്നലെ വൈകിട്ട് വീട്ടുവളപ്പിൽ നടന്നു. കൊച്ചിയിലെ സ്വകാര്യ മെഡിക്കൽ കമ്പനി ഉദ്യോഗസ്ഥ സജിതയാണ് ഭാര്യ. ഒമ്പതാം ക്ലാസ് വിദ്യാർത്ഥി ഹരികൃഷ്‌ണൻ, നാലാം ക്ലാസ് വിദ്യാർത്ഥി പാർവതി എന്നിവരാണ് മക്കൾ.
സന്തോഷിന്റെ നിര്യാണത്തിൽ ഗവർണർ ആരിഫ് മുഹമ്മദ് ഖാൻ, മുഖ്യമന്ത്രി പിണറായി വിജയൻ, മന്ത്രിമാരായ വി.ശിവൻകുട്ടി , മുഹമ്മദ് റിയാസ് എന്നിവർ അനുശോചനം രേഖപ്പെടുത്തി.