ബാലരാമപുരം: മയക്കുമരുന്നുപോലെയുള്ള സാമൂഹ്യവിപത്താണ് സ്ത്രീധനമെന്നും ഇവയ്ക്കെതിരായുള്ള കാമ്പെയിൻ ഏറ്റെടുക്കാൻ പൊതുസമൂഹം തയ്യാറാകണമെന്നും മന്ത്രി ആന്റണി രാജു ആവശ്യപ്പെട്ടു. പി.എൻ. പണിക്കർ ഫൗണ്ടേഷൻ കസ്തൂർബ ഗ്രാമീണ ഗ്രന്ഥശാലയുമായി ചേർന്ന് സംഘടിപ്പിച്ച ഗാന്ധിജയന്തി ആഘോഷം ഉദ്ഘാടനം ചെയ്യുകയായിരുന്നു അദ്ദേഹം. ഫൗണ്ടേഷന്റെ നേതൃത്വത്തിൽ ഒരു മാസം നീണ്ടുനിൽക്കുന്ന സ്വാതന്ത്ര്യത്തിന്റെ അമൃതമഹോത്സവത്തിനും തുടക്കമായി. ഡിജിറ്റൽ സാക്ഷരതാ പരിപാടി, വനിതാ തൊഴിൽ പരിശീലനം, വിജ്ഞാന സദസുകൾ, ലഹരിവിരുദ്ധ കാമ്പെയിനുകൾ, ക്വിസ്-ഉപന്യാസ മത്സരങ്ങൾ എന്നിവ ഇതിന്റെ ഭാഗമായി സംഘടിപ്പിക്കും. ഗ്രന്ഥശാലയുടെ വനിതാ വായനാ മത്സരങ്ങളും മന്ത്രി ഉദ്ഘാടനം ചെയ്തു.

പി.എൻ. പണിക്കർ ഫൗണ്ടേഷൻ വൈസ് ചെയർമാൻ എൻ. ബാലഗോപാൽ അദ്ധ്യക്ഷത വഹിച്ചു. ഗ്രേഷ്യസ് ബഞ്ചമിൻ രചിച്ച വീട്ടുവളപ്പിലെ പക്ഷി വളർത്തൽ എന്ന പുസ്തകം മന്ത്രി എൻ. ബാലഗോപാലിന് നൽകി പ്രകാശനം ചെയ്തു. അഡ്വ.വി.എസ്. ഹരീന്ദ്രനാഥ് ഗാന്ധിസ്മൃതി പ്രഭാഷണം നടത്തി. യുവകലാസാഹിതി ജില്ലാ സെക്രട്ടറി അഡ്വ.സി.എ. നന്ദകുമാർ, താലൂക്ക് ലൈബ്രറി കൗൺസിൽ ജോ. സെക്രട്ടറി കെ.എസ്. പ്രദീപ്,കസ്തൂർബ ഗ്രാമീണ ഗ്രന്ഥശാല സെക്രട്ടറി എം. മഹേഷ്‌കുമാർ എന്നിവർ സംസാരിച്ചു.