ആറ്റിങ്ങൽ: മഴക്കെടുതിയിൽ ചിറയിൻകീഴ് താലൂക്കിൽ നശിച്ചത് ഒൻപത് വീടുകൾ. പഴയകുന്നുമ്മേൽ,​ ഇടയ്ക്കോട്,​ കോരാണി,​ കൊടുവഴന്നൂർ,​ നഗരൂർ,​ ആലംകോട്,​ മഞ്ചാടിമൂട്,​ കല്ലുവിള,​ കരവാരം എന്നിവിടങ്ങളിലാണ് വീടുകൾ ഭാഗികമായി തകർന്നത്. താഴ്ന്ന പ്രദേശങ്ങൾ വെള്ളത്തിനടിയിലായതോടെ നിരവധി വീടുകളിൽ വെള്ളംകയറി.

ഏക്കർ കണക്കിന് ഭൂമിയിലെ കൃഷി നശിച്ചു. കിഴുവിലം ഗ്രാമപഞ്ചായത്തിൽ 18,​19 വാർഡുകളിൽ വെള്ളപ്പൊക്ക ഭീഷണിയുള്ളതിനാൽ പടനിലം സ്കൂളിൽ ദുരിതാശ്വാസ ക്യാമ്പ് ആരംഭിച്ചു. 15 കുടുംബങ്ങളിലെ 32 പേരാണ് ക്യാമ്പിലുള്ളത്. ആറ്റിങ്ങൽ നഗരസഭയിൽ പനവേലിപറമ്പ്,​ കരിച്ചിയിൽ,​ മീമ്പാട്ട്,​ കൊട്ടിയോട്,​ ആളള്ളൂർ എന്നിവിടങ്ങളിലെ താഴ്ന്ന പ്രദേശങ്ങൾ തിങ്കളാഴ്ച രാത്രിയോടെ വെള്ളത്തിനടിയിലായി. വ്യാപക കൃഷിനാശവും സംഭവിച്ചു. ഏത് സാഹചര്യത്തെയും നേരിടാൻ നഗരസഭ നടപടി സ്വീകരിച്ചു.

ആളള്ളൂർ ഏലാ പൂർണമായി വെള്ളം കയറിയതിനാൽ മുദാക്കൽ പഞ്ചായത്തിലെ സരസ്വതി,​ രാജലക്ഷ്മി,​ സജന,​ ഭായി,​ രേഖ എന്നിവരുടെ വീടുകളിൽ വെള്ളം കയറി. ഇവർ സമീപത്തെ വീടുകളിൽ അഭയം തേടി. മീമ്പാട്ട് ഏലായിലും വൻ കൃഷിനാശമുണ്ടായി.കൊല്ലമ്പുഴയിലെ കുട്ടികളുടെ പാർക്ക് പൂർണമായി വെള്ളത്തിലായി. മണ്ണൂർഭാഗത്ത് കോഴിഫാമിൽ വെള്ളം കയറി 1500 കോഴികൾ ചത്തു. വിജയകുമാരി-ശിവദാസൻ ദമ്പതികളുടെ ആലംകോട്ടെ വീട്ടിനോട് ചേർന്ന ഫാമിലുണ്ടായിരുന്ന 1500 കോഴി,​ ഒരു കുതിര,​ ആറ് ആട്,​ രണ്ട് കുട്ടിയാട്,​ 200 താറാവ് എന്നിവയെ കാണാതായി. ഇവിടെ രാത്രി രണ്ടുമണിയോടെയാണ് വെള്ളം ഇരച്ചുകയറിയത്. 3 ലക്ഷം രൂപയുടെ നഷ്ടമുണ്ടായതായി വീട്ടുകാർ പറയുന്നു. മഴക്കെടുതിയിൽ പെട്ടവർക്ക് അടിയന്തര സഹായത്തിനുള്ള എല്ലാ നിർദ്ദേശങ്ങളും നല്കിയതായി തഹസീൽദാർ അറിയിച്ചു.