കല്ലമ്പലം: കൊവിഡിനെ തുടർന്ന് അടച്ചിട്ടിരുന്ന വിദ്യാലയങ്ങൾ നവംബർ 1 മുതൽ തുറന്നു പ്രവർത്തിക്കാനിരിക്കെ വെട്ടിയറ ​ഗവ.എൽ.പി.എസിനെ ഏറ്റെടുത്ത് പുതുമോടി വീണ്ടെടുക്കുകയാണ് ചിന്ത ​ഗ്രന്ഥശാലയും ഒരുകൂട്ടം അക്ഷര സ്നേഹികളും. പദ്ധതിയുടെ ഭാ​ഗമായി ക്ലാസ് മുറികളെല്ലാം കഴുകി വൃത്തിയാക്കി. ചുമരിൽ ചായം തേച്ച് മനോഹരമാക്കി. സ്കൂളിന്റ ഭൗതിക സാഹചര്യം മെച്ചപ്പെടുത്തി ക്ലാസുകൾ ശിശുസൗഹൃദമാക്കാനാണ് ​ഗ്രന്ഥശാലയുടെ പദ്ധതി. 1വരെ നീണ്ടുനിൽക്കുന്ന ശുചീകരണ യജ്ഞത്തിന്റെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്റ് ബി.പി. മുരളി നിർവഹിച്ചു. പഞ്ചായത്ത് പ്രസിഡന്റ് ബേബിരവീന്ദ്രൻ, അരുൺകുമാർ തുടങ്ങിയവർ നേതൃത്വം നൽകി.