കുന്ദമംഗലം: കടന്നൽക്കുത്തേറ്റ് ഗുരുതരാവസ്ഥയിൽ കോഴിക്കോട് മെഡിക്കൽകോളേജ് ആശുപത്രിയിൽ ചികിത്സയിലായിരുന്ന എക്സൈസ് ഡ്രൈവർ മരിച്ചു. ചാത്തമംഗലം നെച്ചൂളി പാറക്കണ്ടിയിൽ സുധീഷാണ് (48) മരിച്ചത്.

ഇക്കഴിഞ്ഞ ശനിയാഴ്ച വീട്ടുവളപ്പിലെ ജോലിക്കിടയിൽ കടന്നൽക്കുത്തേറ്റയാളെ രക്ഷിക്കാനുള്ള ശ്രമത്തിനിടയിലാണ് കടന്നലുകളുടെ കൂട്ട ആക്രമണത്തിന് സുധീഷ് ഇരയായത്. ഓടിയെത്തിയ അയൽവാസികൾ ഉടനെ ആശുപത്രിയിൽ എത്തിക്കുകയായിരുന്നു. വെന്റിലേറ്ററിൽ ചികിത്സയിൽ കഴിയവേ വ്യാഴാഴ്ച പുലർച്ചെയായിരുന്നു മരണം. ഭാര്യ: രജിത. മകൾ: ആര്യ.