തിരുവനന്തപുരം: ദിവസങ്ങൾ നീണ്ട പരിശ്രമങ്ങൾക്കൊടുവിൽ നാലാഞ്ചിറ മാർക്കറ്റിന് സമീപത്തെ വലിയകുളത്തിന് പുതുജീവൻ. തൊഴിലുറപ്പ് തൊഴിലാളികളായ 30 സ്ത്രീകളുടെ 9 ദിവസത്തെ അദ്ധ്വാനത്തിലൂടെയാണ് നാശോന്മുഖമായ കുളത്തിന് ശാപമോക്ഷമേകിയത്. കുളം പൂർണമായും മൂടിയ പായൽ വാരിമാറ്റുകയും കുട്ടികളുടെ പാർക്ക്,​ ഇരിപ്പിടങ്ങൾ, ലൈറ്റുകൾ എന്നിവ സ്ഥാപിച്ച് കുളത്തിന് ചുറ്റും അലങ്കാരച്ചെടികളും ഫലവൃക്ഷത്തൈകളും നട്ടുപിടിപ്പിക്കുകയും ചെയ്തു.

തിരുവനന്തപുരം കോസ്‌മോ പൊളിറ്റ‌ൻ ക്ളബ്,​ ലയൺസ് ക്ളബ് എന്നിവ‌ സംയുക്തമായിട്ടാണ് ആറ് സോളോർ ലൈറ്റുകൾ, ​12 ബെഞ്ചുകൾ,​ കുട്ടികളുടെ പാർക്കിന് ആവശ്യമായ ഉപകരണങ്ങൾ എന്നിവ സ്പോൺസർ ചെയ്‌ത്. തിരുവനന്തപുരം നഗരസഭയുടെ സ്മാർട്ട് സിറ്റി പദ്ധതിയിലുൾപ്പെടുത്തിയാണ് നവീകരണം നടപ്പാക്കിയതെന്ന് കിണവൂർ വാർഡ് കൗൺസിലർ ആർ.സുരകുമാരി പറഞ്ഞു. ചെറുകിട ജലസേചന പദ്ധതിയിൽ ഉൾപ്പെടുത്തി നേരത്തെയും രണ്ട് പ്രാവശ്യം കുളം പുനരുദ്ധരിച്ചിരുന്നു.