വർക്കല: കേരളകൗമുദിയുടെ 110-ാം വാർഷികത്തോടനുബന്ധിച്ച് കേരളകൗമുദിയും വർക്കല സൗഹൃദ കുടുംബ കൂട്ടായ്‌മയുടെയും (എസ്.കെ ഗ്രൂപ്പ് ) സഹകരണത്തോടെ ഇടവ ഗ്രാമപഞ്ചായത്തിലെ കൊവിഡ് പ്രതിരോധ പ്രവർത്തകരെയും ആശാവർക്കർമാരെയും ആരോഗ്യപ്രവർത്തകരെയും വിവിധ മേഖലകളിൽ വ്യക്തിമുദ്ര പതിപ്പിച്ചവരെയും ആദരിച്ചു. വർക്കല മൈതാനം എസ്.ആർ മിനി ഓഡിറ്റോറിയത്തിൽ നടന്ന ആദരിക്കൽ ചടങ്ങ് വി. ജോയി എം.എൽ.എ ഉദ്ഘാടനം ചെയ്‌തു.
സമൂഹത്തിലെ പാർശ്വവത്കരിക്കപ്പെട്ടവരുടെ ശബ്ദമാണ് കേരളകൗമുദിയെന്നും നിക്ഷ്പക്ഷതയും സത്യസന്ധതയും കേരളകൗമുദിയുടെ മുഖമുദ്ര‌യാണെന്നും എം.എൽ.എ പറഞ്ഞു. ഇടവ ഗ്രാമപഞ്ചായത്ത് പ്രസിഡന്റ് എ. ബാലിക്ക് അദ്ധ്യക്ഷത വഹിച്ചു. ശ്രീനാരായണ ധർമ്മസംഘം ട്രസ്റ്റ് ബോർഡ് അംഗവും ഗുരുധർമ്മ പ്രചരണ സഭാ സെക്രട്ടറിയുമായ സ്വാമി സച്ചിദാനന്ദ അനുഗ്രഹ പ്രഭാഷണം നടത്തി. ഗുരുദേവ ദർശനങ്ങളിൽ അടിയുറച്ച് നിന്നുകൊണ്ട് സമൂഹത്തിലെ തിന്മകളെ തുറന്നുകാട്ടുന്നതിൽ കേരളകൗമുദി വഹിക്കുന്ന പങ്ക് നിസ്‌തുലമാണെന്ന് സ്വാമി പറഞ്ഞു. കേരളകൗമുദി പത്രം സാധാരണക്കാരുടെ വികാരമാണെന്ന് മുഖ്യപ്രഭാഷണം നടത്തിയ നടൻ പ്രേംകുമാർ പറഞ്ഞു.
കേരളകൗമുദി ഡി.ജി.എം. ആർ. ചന്ദ്രദത്ത്, എസ്.എൻ.ഡി.പി യോഗം ശിവഗിരി യൂണിയൻ സെക്രട്ടറി അജി എസ്.ആർ.എം, അഡ്വ.കെ.ആർ. അനിൽകുമാർ, അഡ്വ.എസ്. കൃഷ്‌ണകുമാർ, ജില്ലാ പഞ്ചായത്ത് അംഗം വി. പ്രിയദർശിനി, എസ്.കെ ഗ്രൂപ്പ് ചെയർമാൻ മോഹൻദാസ്, പ്രതിനിധികളായ ആശാ മോഹൻ, അശ്വതി പ്രസി, പ്രശാന്ത് പ്രസി, ബിന്ദു ഗണേഷ് തുടങ്ങിയവർ സംസാരിച്ചു. പ്രമുഖ വ്യവസായിയും ജീവകാരുണ്യ പ്രവർത്തകനുമായ അബ്ദുൾ ഹമീദ് ബഷീർ ഇടവ, വർക്കല ഡിവൈ.എസ്.പി പി. നിയാസ്, വർക്കല സൗഹൃദ കുടുംബ കൂട്ടായ്മ ചെയർമാൻ മോഹനൻ, റെയിൽവേ സ്റ്റേഷൻ സൂപ്രണ്ട് സി. പ്രസന്നകുമാർ, കണ്ണൂർ സർവകലാശാല മുൻ വൈസ് ചാൻസലർ ഡോ.പി. ചന്ദ്രമോഹൻ, മൈക്രോൺ കമ്പ്യൂട്ടേഴ്സ് എം.ഡി മണിലാൽ, മുരുക്കുമ്പുഴ തൃശൂർ ഗോൾഡ് ജുവലേഴ്സ് എം.ഡി എസ്. ഉണ്ണിക്കൃഷ്ണൻ, വർക്കല ജയ ഏജൻസീസ് എം.ഡി അജിത് കുമാർ, പുനർജനി ട്രസ്റ്റ് ചെയർമാൻ ട്രോസി ജയൻ, ഓൾ കേരള ഗവ. കോൺട്രാക്ടേഴ്സ് അസോസിയേഷൻ ട്രഷറർ ജി. തൃദീപ്, വർക്കല അരിസ്റ്റോ ഇലക്ട്രിക്കൽസ് ഉടമ രാഹുൽ, ഗോകുലം കൺസ്ട്രക്ഷൻ എം.ഡി എൻ. സുരേഷ്, ഡോ. വിജയകുമാർ, പണയിൽ ഫിനാൻസ് ഉടമ അജയകുമാർ, ഹിപ്നോട്ടിക് മാത്‌സ് ഹെഡ് ബൈജു രാമകൃഷ്ണൻ, ഇടവ പി.എച്ച്.സി മെഡിക്കൽ ഓഫീസർ ഡോ.ജി. രാജു, ഇടവ ഗ്രാമപഞ്ചായത്തിലെ ആശാവർക്കർമാർ, റാപ്പിഡ് റെസ്‌പോൺസ് ടീം അംഗങ്ങൾ എന്നിവർക്ക് ഉപഹാരങ്ങൾ നൽകി ആദരിച്ചു. കേരളകൗമുദി അസി. മാർക്കറ്റിംഗ് മാനേജർ ബി. സുധികുമാർ സ്വാഗതവും വർക്കല ലേഖകൻ സജീവ് ഗോപാലൻ നന്ദിയും പറഞ്ഞു.