തിരുവനന്തപുരം: നാല്പത്തിയഞ്ചാമത് വയലാർ രാമവർമ്മ മെമ്മോറിയൽ സാഹിത്യ അവാർഡ് ബെന്യാമിന് വയലാർ രാമവർമ്മ ട്രസ്റ്റ് പ്രസിഡന്റ് പെരുമ്പടവം ശ്രീധരൻ ഇന്ന് സമ്മാനിക്കും. വൈകിട്ട് 5.30ന് നിശാഗന്ധി ഒാഡിറ്റോറിയത്തിലാണ് ചടങ്ങ്.

ഒരു ലക്ഷം രൂപയും പ്രശസ്ത ശിൽപി കാനായി കുഞ്ഞിരാമൻ വെങ്കലത്തിൽ നിർമ്മിച്ച ശില്പവും പ്രശസ്തി പത്രവുമടങ്ങുന്നതാണ് അവാർഡ്.

ചെന്നൈ ആശാൻ മെമ്മോറിയൽ ഹയർ സെക്കൻഡറി സ്‌കൂളിൽ നിന്ന് മലയാളം ഐച്ഛിക വിഷയമായെടുത്ത് ഏറ്റവും കൂടുതൽ മാർക്ക് വാങ്ങി പത്താം ക്ലാസ് പാസായ കുമാരി മേഘ്‌നാ നായർക്ക് വയലാർ രാമവർമ്മയുടെ പേരിലുളള സ്‌കോളർഷിപ്പും ചടങ്ങിൽ വച്ച് നൽകും. ട്രസ്റ്റ് വൈസ് പ്രസിഡന്റ് പ്രൊഫ.ജി.ബാലചന്ദ്രൻ, സെക്രട്ടറി സി.വി.ത്രിവിക്രമൻ, അംഗങ്ങളായ കെ.ജയകുമാർ, പ്രഭാവർമ്മ, തുടങ്ങിയവർ പങ്കെടുക്കും. തുടർന്ന് ദേവരാജൻ മാസ്റ്റർ ഫൗണ്ടേഷന്റെ നേത്യത്വത്തിൽ വയലാർ ഗാനസന്ധ്യ അരങ്ങേറും.