തിരുവനന്തപുരം: ശ്രീലങ്കയുടെ തീരത്തായി ബംഗാൾ ഉൾക്കടലിൽ രൂപംകൊണ്ട ന്യൂനമർദ്ദം ശക്തിപ്രാപിച്ച് കന്യാകുമാരി തീരങ്ങളിലൂടെ അറബിക്കടലിലേക്ക് നീങ്ങുവാനുള്ള സാദ്ധ്യത കണക്കിലെടുത്ത് സംസ്ഥാനത്ത് ഇന്ന് വ്യാപകമായ മഴയുണ്ടാകുമെന്ന് കാലാവസ്ഥാകേന്ദ്രം മുന്നറിയിപ്പ് നൽകി.ന്യൂനമർദ്ദം ശക്തിപ്രാപിച്ചാൽ ചുഴലിക്കാറ്റാകാനുള്ള സാദ്ധ്യതയുമുണ്ട്.

ഇന്ന് തിരുവനന്തപുരം, കൊല്ലം, പത്തനംതിട്ട,ആലപ്പുഴ, കോട്ടയം,ഇടുക്കി ജില്ലകളിൽ ഒാറഞ്ച് അലർട്ടും എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട് ,വയനാട് ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്.

സംസ്ഥാനത്തിന്റെ തീരക്കടൽ പ്രക്ഷുബ്ധമായിരിക്കും. മണിക്കൂറിൽ 60കിലോമീറ്റർ വരെ വേഗത്തിൽ കാറ്റടിക്കാനും സാധ്യതയുണ്ട്. മത്സ്യത്തൊഴിലാളികൾ നവംബർ ഒന്നുവരെ കടലിൽ പോകരുതെന്ന് മുന്നറിയിപ്പുണ്ട്. 31 വരെ സംസ്ഥാനത്ത് മഴയുണ്ടാകുമെന്നാണ് റിപ്പോർട്ട്.