കല്ലമ്പലം: പുതുശേരിമുക്ക് റോഡിൽ ഇടവൂർക്കോണത്ത് സ്വകാര്യ ബസും കാറും കൂട്ടിയിടിച്ചുണ്ടായ അപകടത്തിൽ അഞ്ചുപേർക്ക് പരിക്കേറ്റു. കാർ ഡ്രൈവർ ചാത്തന്നൂർ മീനാട് ചരുവിളവീട്ടിൽ അൽ അമീൻ (18), ബസ് യാത്രികരായ വർക്കല നരിക്കല്ലുമുക്ക് സമീർ മൻസിലിൽ ഹസീന (42), കല്ലമ്പലം ചേന്നൻകോട് ശിവഗംഗയിൽ ജോഷിനി (41), കല്ലമ്പലം മാവിന്മൂട് ഷൈലാ മന്ദിരത്തിൽ ഷീല (50), പാലോട് എക്‌സ് സർവീസ്‌മെൻ കോളനിയിൽ ബ്ലോക്ക് നമ്പർ 42ൽ സജീവ് (40) എന്നിവർക്കാണ് പരിക്കേറ്റത്.

കഴിഞ്ഞ ദിവസം 5.30ഓടെയായിരുന്നു സംഭവം. യാത്രക്കാരുമായി പാലോട്ട് നിന്ന് കല്ലമ്പലത്തേക്ക് വന്ന സ്വകാര്യ ബസിൽ എതിർദിശയിൽ നിന്നെത്തിയ കാർ കൂട്ടിയിടിക്കുകയായിരുന്നു. കാറിന്റെ മുൻവശം പൂർണമായി തകർന്നു. പരിക്കേറ്റവരെ നാട്ടുകാരും കല്ലമ്പലം പൊലീസുമെത്തി സ്വകാര്യ ആശുപത്രിയിലേക്ക് മാറ്റി.