തിരുവനന്തപുരം: നഗരത്തിലെ പ്രധാന ബസ് സ്റ്റേഷനുകളായ കിഴക്കേകോട്ട, തിരുവനന്തപുരം സെൻട്രൽ എന്നിവിടങ്ങളിൽ എത്താതെ തന്നെ നഗരത്തിനുള്ളിലും പ്രാന്തപ്രദേശങ്ങളിലും കുറഞ്ഞ ചെലവിൽ സഞ്ചരിക്കാൻ സാധിക്കുന്ന സിറ്റി സർക്കുലറിന്റെ രണ്ടാമത്തെ ട്രയൽ റണ്ണും വിജയകരമെന്ന് കെ.എസ്.ആർ.ടി.സി അറിയിച്ചു. 10 മിനിറ്റ്, 15 മിനിറ്റ് ഇടവേളകളിൽ നടത്തിയ രണ്ടാം ട്രയൽ റണ്ണും വിജയിച്ചതോടെ തിരക്കുള്ള ദിവസം മൂന്നാമത്തെ ട്രയൽ റൺ നടത്തി നവംബർ രണ്ടാംവാരത്തോടെ സർവീസ് ആരംഭിക്കാനാണ് തീരുമാനം.

നീല, ചുവപ്പ്, ഓറഞ്ച്, പർപ്പിൾ, പച്ച, മഞ്ഞ, ബ്രൗൺ എന്നീ നിറങ്ങളിലാണ് ഓരോ സർവീസുകളും. ചുവപ്പും വെള്ളയും നിറത്തിലുള്ള ബസുകളാണ് സിറ്റി സർക്കുലർ സർവീസിനായി ഉപയോഗിക്കുന്നത്. ഓരോ റൂട്ടുകളിലും പ്രത്യേക നിറത്തിലുള്ള സർവീസായിരിക്കും. ഇത് പുറത്ത് പ്രദർശിപ്പിക്കുകയും ആ നിറത്തിലുള്ള സീറ്റുകവറുകൾ ഉപയോഗിക്കുകയും ചെയ്യും. ( ഉദാ: ബ്ലൂ സർക്കിൾ ബസിന്റെ സീറ്റ് കവർ നീല ആയിരിക്കും. അങ്ങനെ വ്യത്യസ്തമായ സീറ്റുകവറുകൾ). വ്യത്യസ്ഥമായ റൂട്ടുകളിൽ കൃത്യമായ ഇടവേളകളിൽഹോപ്പ് ഓൺ ഹോപ്പ് ഒഫ് മാതൃകയിലാണ് അന്തിമ സർവീസ് ക്രമീകരിക്കുക. ആദ്യഘട്ടത്തിൽ ഏഴ് സർക്കുലർ റൂട്ടുകളിലാണ് സർവീസ് ആരംഭിക്കുക. തുടർന്ന് 15 റൂട്ടുകളിൽ സർവീസ് നടത്തും.