കല്ലോടി: ക്ലീൻ ഗ്രീൻ എടവക പദ്ധതിയുടെ ഭാഗമായി എടവക സമ്പൂർണ ഹരിത ഗ്രാമപഞ്ചായത്ത് പ്രഖ്യാപനം ഒ.ആർ കേളു എം.എൽ.എ നിർവഹിച്ചു. ആസാദി കാ അമൃത് മഹോത്സവത്തിന്റെ ഭാഗമായുള്ള ശുചിത്വ മേഖലയിലെ നേട്ടങ്ങളുടെ പ്രചാരണം, എടവക വില്ലേജ് ഒ.ഡി.എഫ്.പ്ലസ് പ്രഖ്യാപനം, മികവു പുലർത്തിയ ഹരിത കർമ സേനാംഗങ്ങളെ ആദരിക്കൽ എന്നിവയും പരിപാടിയുടെ ഭാഗമായി നടന്നു. സമ്പൂർണ ഹരിത പഞ്ചായത്ത് പ്രഖ്യാപനത്തിന്റെ മുന്നോടിയായി പഞ്ചായത്തിലെ എല്ലാ വീടുകളിലും ഹരിതകർമസേനാംഗങ്ങളുടെയും വാർഡ് മെമ്പർമാരുടെയും ഉദ്യോഗസ്ഥരുടെയും നേതൃത്വത്തിൽ ഗൃഹസന്ദർശനം നടത്തി മാലിന്യ സംസ്‌കരണ ബോധവത്കരണം നടത്തിയിരുന്നു. എടവക സ്വരാജ് ഹാളിൽ നടന്ന ചടങ്ങിൽ ഗ്രാമപഞ്ചായത്ത് പ്രസിഡന്റ് എച്ച്. ബി പ്രദീപ് അദ്ധ്യക്ഷത വഹിച്ചു. മാലിന്യ ലഘൂകരണത്തിലും മാലിന്യ സംസ്‌കരണത്തിലും മാതൃകയായ ഷിന്റോ ആന്റണിയെ ബ്ലോക്ക് പഞ്ചായത്ത് പ്രസിഡന്റ് ജസ്റ്റിൻ ബേബി ആദരിച്ചു. മംഗലശ്ശേരി മാധവൻ പ്രഭാഷണം നടത്തി. ഗ്രാമപഞ്ചായത്ത് വൈസ് പ്രസിഡന്റ് ജംസീറ ശിഹാബ്, സ്റ്റാൻഡിംഗ് കമ്മിറ്റി ചെയർമാൻമാരായ ജോർജ് പടകൂട്ടിൽ, ജൻസി ബിനോയി, ശിഹാബ് ആയാത്ത്, ഗ്രാമപഞ്ചായത്തംഗം സി.എം സന്തോഷ്, ഷിന്റോ ആന്റണി, ശുചിത്വ മിഷൻ ജില്ലാ കോർഡിനേറ്റർ വി.കെ ശ്രീലത തുടങ്ങിയവർ പങ്കെടുത്തു.

ഒരാഴ്ച നീണ്ടു നിൽക്കുന്ന ശുചിത്വ വാരാചരണത്തിന്റെ ഭാഗമായി കൂട്ടയോട്ടം, ഹരിത കർമ സേനാംഗങ്ങൾക്കായുള്ള നേതൃത്വ പരിശീലനം, പാഴ് വസ്തുക്കളിൽ നിന്നുള്ള ഉത്പന്നങ്ങളുടെ പ്രദർശനം, ശുചിത്വ സന്ദേശ ചുവരെഴുത്ത്, ദ്രവ മാലിന്യ സംസ്‌കരണ യൂണിറ്റുകളുടെ ഉദ്ഘാടനം എന്നീ പരിപടികളും നടക്കും. ഒക്ടോബർ 8 ന് നടക്കുന്ന സമാപന സമ്മേളനം ജില്ലാ പഞ്ചായത്ത് പ്രസിഡന്റ് സംഷാദ് മരയ്ക്കാർ ഉദ്ഘാടനം ചെയ്യും. മുൻ ജനപ്രതിനിധികളേയും, മുൻ പ്രാദേശിക ആസൂത്രണ വിദഗ്ധരേയും ചടങ്ങിൽ ആദരിക്കും.

തരിയോട് സമ്പൂർണ ഹരിത ഗ്രാമപഞ്ചായത്ത് പ്രഖ്യാപനം ഗ്രാമപഞ്ചായത്ത് പ്രസിഡന്റ് വി.ജി ഷിബു നിർവഹിച്ചു. തരിയോട് ഗ്രാമപഞ്ചായത്തിലെ കാവുംമന്ദം, തരിയോട് വില്ലേജുകൾക്ക് ഒ.ഡി.എഫ്.പ്ലസ് പദവിയും ലഭിച്ചിട്ടുണ്ട്. തരിയോട് ഗ്രാമപഞ്ചായത്ത് ഹാളിൽ നടന്ന ചടങ്ങിൽ സ്റ്റാൻഡിംഗ് കമ്മിറ്റി ചെയർമാൻ ഷമീം പാറക്കണ്ടി അദ്ധ്യക്ഷത വഹിച്ചു. സ്തുത്യർഹമായ പ്രവർത്തനം നടത്തുന്ന ഹരിതകർമ്മ സേന അംഗങ്ങളെ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ഷീജ ആന്റണി ആദരിച്ചു. മെമ്പർമാരായ വിജയൻ തോട്ടുങ്ങൽ, പുഷ്പ മനോജ്, വത്സല നളിനാക്ഷൻ, ഗ്രാമപഞ്ചായത്ത് സെക്രട്ടറി എം.ബി. ലതിക, വി.ഇ.ഒ ഡി. ജോയ്സി, ഹരിത സഹായസംഘം പ്രതിനിധി രാജേഷ് തുടങ്ങിയവർ പങ്കെടുത്തു.