കൽപ്പറ്റ: ജില്ലയിൽ കൊവിഡ് ബാധിതരുടെ എണ്ണം കുറയുമ്പോഴും ടെസ്റ്റ് പോസിറ്റിവിറ്റി താഴുന്നില്ല. ഇന്നലെ 263 പേർക്ക് രോഗം സ്ഥിരീകരിച്ചപ്പോൾ ടി.പി.ആർ 14. 64 ശതമാനമാണ്. 474 പേർ രോഗമുക്തി നേടി. 2 ആരോഗ്യ പ്രവർത്തകർ ഉൾപ്പെടെ 262 പേർക്കും സമ്പർക്കത്തിലൂടെയാണ് രോഗബാധ.

നിലവിൽ 3600 പേരാണ് ജില്ലയിൽ ചികിത്സയിലുള്ളതെന്ന് ഡി.എം.ഒ ഡോ.ആർ.രേണുക പറഞ്ഞു. ഇവരിൽ 3272 പേരും വീടുകളിലാണ് ഐസെലേഷനിൽ കഴിയുന്നത്. ജില്ലയിൽ കൊവിഡ് സ്ഥിരീകരിച്ചവരുടെ എണ്ണം ഇപ്പോൾ 1,20,235 ആയി. ഇതുവരെ രോഗമുക്തരായത് 1,15,902 പേർ.

 സമ്പർക്കം

നെന്മേനി 26, തൊണ്ടർനാട് 24, വെള്ളമുണ്ട 20, ബത്തേരി 19, മീനങ്ങാടി 17, തവിഞ്ഞാൽ 15, മുള്ളൻകൊല്ലി 14, എടവക, മാനന്തവാടി 13 വീതം, പനമരം 12, കൽപ്പറ്റ, മുട്ടിൽ, പടിഞ്ഞാറത്തറ 11 വീതം, കോട്ടത്തറ 9, പുൽപ്പള്ളി 8, വൈത്തിരി 7, പൂതാടി 6, അമ്പലവയൽ, മേപ്പാടി 5 വീതം, നൂൽപ്പുഴ, പൊഴുതന 4 വീതം, വെങ്ങപ്പള്ളി 3, തിരുനെല്ലി 2, കണിയാമ്പറ്റ, മൂപ്പൈനാട്, തരിയോട് 1 വീതം.

 നിരീക്ഷണത്തിൽ 1014 പേർ

ഇന്നലെ 1014 പേരാണ് നിരീക്ഷണത്തിലായത്. ഇവരിൽ 32 പേർ ആശുപത്രിയിലാണ്. 1277 പേർ നിരീക്ഷണകാലം പൂർത്തിയാക്കി. നിലവിൽ നിരീക്ഷണത്തിലുള്ളത് 13,190 പേരാണ്.

കഴിഞ്ഞ 24 മണിക്കൂറിനിടെ 1337 സാമ്പിളുകളാണ് പരിശോധനയ്ക്ക് അയച്ചത്. ഇതുവരെ മൊത്തം അയച്ചത് 8,01,052 സാമ്പിളുകൾ. ഇതിൽ 8,00,587 എണ്ണത്തിന്റെ ഫലം ലഭിച്ചു. 6,80,352 പേർ നെഗറ്റീവും 1,20,235 പേർ പോസിറ്റീവുമായി.