ഹരിപ്പാട്: നിയന്ത്രണം വിട്ട മിനിലോറി ഓട്ടോറിക്ഷാ സ്റ്റാൻഡിലേക്ക് ഇടിച്ചുകയറി ഏഴുപേർക്ക് പരിക്കേറ്റു. അഞ്ച് ഓട്ടോ ഡ്രൈവർമാർക്കും രണ്ട് യാത്രക്കാർക്കുമാണ് പരിക്കേറ്റത്. ദേശീയപാതയിൽ ഹരിപ്പാട് കെ.എസ്.ആർ.ടി.സി ബസ് സ്റ്റേഷന് സമീപം ഇന്നലെ പുലർച്ചെ നാലോടെയായിരുന്നു അപകടം.

ഓട്ടോ ഡ്രൈവർമാരായ കാർത്തികപ്പള്ളി എരിക്കാവ് രാകേന്ദു വീട്ടിൽ അനീഷ് (36), പുതുക്കുളം ശങ്കര നിവാസിൽ ശിവശങ്കര കുറുപ്പ് (46), ഹരിപ്പാട് കൃഷ്ണ ഭവനത്തിൽ ഹരികൃഷ്ണൻ (24), ഹരിപ്പാട് വെട്ടുവേനി എബി ഭവനത്തിൽ എബി ജോൺ (41), തൃക്കുന്നപ്പുഴ പതിയാങ്കര കൊച്ചു തറയിൽ ഷിബിൻ (24), യാത്രക്കാരൻ ഹരിപ്പാട് ഇരികുളം പുത്തൻവീട്ടിൽ ജയചന്ദ്രൻ (51), ലോറിയിൽ എറണാകുളത്ത് നിന്ന് തിരുവനന്തപുരത്തേക്ക് പോയ യുവാവ് എന്നിവർക്കാണ് പരിക്കേറ്റത്. ഇവരെ ആദ്യം ഹരിപ്പാട് താലൂക്ക് ആശുപത്രിയിലും പിന്നീട് ആലപ്പുഴ മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. ആറ് ഓട്ടോറിക്ഷകൾക്കും ഒരു സ്കൂട്ടറിനും കേടുപാടുകൾ സംഭവിച്ചു. ഹരിപ്പാട് പൊലീസ് മേൽനടപടി സ്വീകരിച്ചു