മൂവാറ്റുപുഴ: ജെ.സി.ഐ മൂവാറ്റുപുഴ ടൗൺ ചാപ്റ്റർ ഏർപ്പെടുത്തിയ മികച്ച ഗ്രാമീണ സഹകരണബാങ്ക് പ്രസിഡന്റിനുള്ള ജെ.സി.ഐ ഗ്രാമസ്വരാജ് അവാർഡിന് കൂവപ്പടി സഹകരണബാങ്ക് പ്രസിഡന്റ് മനോജ് മൂത്തേടൻ അർഹനായി. 25001 രൂപയും പ്രശസ്തിപത്രവും ഫലകവും 9ന് വൈകിട്ട് 5ന് മൂവാറ്റുപുഴ നിർമ്മല ഹയർ സെക്കൻഡറി സ്കൂൾ ഓഡിറ്റോറിയത്തിൽ വച്ച് നടക്കുന്ന ചടങ്ങിൽ വിതരണം ചെയ്യുമെന്ന് ജെ.സി.ഐ പ്രസിഡന്റ് എൽദോ ജോൺ കാട്ടൂർ, സെക്രട്ടറി അനുപോൾ എന്നിവർ അറിയിച്ചു.

കൂവപ്പടി സഹകരണബാങ്കിൽ നടപ്പിലാക്കിയ നൂതനങ്ങളായ പ്രവർത്തനങ്ങളും കൊവിഡ് മഹാമാരി കാലത്ത് നടത്തിയ ജനക്ഷേമ പ്രവർത്തനങ്ങളും കാർഷിക ഉന്നമനത്തിനായി നടപ്പിലാക്കിയ പ്രവർത്തനങ്ങളും പ്രാഥമിക സഹകരണ ബാങ്കുകൾക്ക് ലഭിക്കുന്ന ഏറ്റവും ഉയർന്ന പദവിയായ ക്ലാസ് 1 സൂപ്പർ ഗ്രേഡ് പദവി നേടാനായതുമെല്ലാം പരിഗണിച്ചാണ് മനോജ് മൂത്തേടനെ അവാർഡിന് തിരഞ്ഞെടുത്തതെന്ന് പ്രൊഫ. ബേബി എം. വർഗീസ്, പ്രൊഫ. കെ.എം. കുര്യാക്കോസ്, പ്രൊഫ. ജോസ് കുട്ടി ജെ. ഒഴുകയിൽ എന്നിവരടങ്ങിയ അവാർഡ് നിർണയകമ്മിറ്റി അറിയിച്ചു.