കോതമംഗലം: നിരാലംബർക്കും നിസ്സഹായർക്കും തണൽവിരിക്കുന്ന പീസ് വാലിയുടെ പ്രവർത്തനങ്ങൾ സഹജീവി സ്നേഹത്തിന്റെ ഉദാത്തമായ മാതൃകയെന്ന് ഗവർണർ ആരിഫ് മുഹമ്മദ്‌ ഖാൻ പറഞ്ഞു. രാജ്ഭവനിൽ നടന്ന കൂടിക്കാഴ്ചയിൽ കൊവിഡാനന്തര കാലത്ത് ഭിന്നശേഷി സമൂഹം നേരിടുന്ന വെല്ലുവിളികൾ അദ്ദേഹം പീസ് വാലി ഭാരവാഹികളുമായി ചർച്ചചെയ്തു. നന്മയിൽ അധിഷ്ഠി​തമായ പ്രവർത്തനങ്ങളെ സമൂഹം എക്കാലത്തും ഹൃദയത്തോട് ചേർക്കുമെന്ന് അദ്ദേഹം പറഞ്ഞു. വൈകാതെ പീസ് വാലി സന്ദർശിക്കാമെന്നു ഗവർണർ ഉറപ്പ് നൽകി. പീസ് വാലി രക്ഷധികാരിയും കേരള അഡ്മിനിസ്‌ട്രേറ്റീവ് ട്രിബ്യൂണൽ ചെയർമാനുമായ ജസ്റ്റിസ് സി. കെ അബ്ദുൽ റഹിം, പീസ് വാലി ചെയർമാൻ പി.എം. അബൂബക്കർ, വൈസ് ചെയർമാൻ കെ. എം. യൂസുഫ് എന്നിവർ കൂടിക്കാഴ്ചയിൽ പങ്കെടുത്തു.