മുളന്തുരുത്തി: വിദ്യാർത്ഥികളിൽ ജനാധിപത്യ ബോധം, പൗരബോധം, നേതൃപാടവം, അച്ചടക്കം, മൗലിക അവകാശങ്ങൾ, കടമകൾ, ഉത്തര വാദിത്വബോധം എന്നിവ രൂപപ്പെടുത്തുന്നതിന് ആരക്കുന്നം സെന്റ് ജോർജ്ജസ് ഹൈസ്‌കൂളിൽ സ്‌കൂൾ പാർലമെന്റ് തിരഞ്ഞെടുത്തു. ഓരോ ഡിവിഷനിൽ നിന്നും വിദ്യാർത്ഥികൾ പാർലമെന്റിലേക്ക് തങ്ങളുടെ പ്രതിനിധികളായി ഒരു ആൺകുട്ടിയെയും ഒരു പെൺകുട്ടിയെയും വീതം തിരഞ്ഞെടുത്തു. ക്ലാസ് പ്രതിനിധികളായി തിരഞ്ഞെടുക്കപ്പെട്ടവർ ചേർന്ന് സ്‌കൂൾ പാർലമെന്റ് ചേർന്നു. ആദ്യ പാർലമെന്റ് സമ്മേളനം സ്‌കൂൾ മാനേജർ സി.കെ റെജി ഉദ്ഘാടനം ചെയ്തു. ഹൈസ്‌കൂൾ ഹെഡ്മിസ്ട്രസ് സി.പ്രീതാജോസ് അദ്ധ്യക്ഷയായി. സ്‌കൂൾ ലീഡറായി ഹൃദ്യ സന്തോഷിനെയും ഡെപ്യൂട്ടി ലീഡറായി സയൻസാബുവിനെയും തിരഞ്ഞെടുത്തു. സ്‌കൂൾ ലീഡറെ അദ്ധ്യക്ഷ പദവിയിലേക്ക് ഹെഡ് മിസ്ട്രസ് സ്വീകരിച്ചിരുത്തി. കൊവിഡ് കാലത്തെ ഓൺലൈൻ പഠനത്തെ സംബന്ധിച്ചും സ്‌കൂൾ തുറന്നതിന് ശേഷമുള്ള കാര്യങ്ങളും കാമ്പസ് പരിസരങ്ങൾ ക്ലീൻ ചെയ്യൽ, ഫർണീച്ചർ, യൂണിഫോം, ബസ് സർവീസ്, ക്രിസ്‌മസ് പരീക്ഷ തുടങ്ങിയ കാര്യങ്ങളിൽ പാർലമെന്റ് അംഗങ്ങൾ സജീവമായി ചർച്ചയിൽ പങ്കെടുത്തു. വിദ്യാർത്ഥികൾ ഉന്നയിച്ച കാര്യങ്ങൾ എല്ലാം ഗൗരവപൂർവ്വം പരിഗണിക്കുമെന്ന് സ്‌കൂൾ മാനേജർ സി.കെ റെജി പറഞ്ഞു. ഹൈസ്‌കൂൾ സീനിയർ അസിസ്റ്റന്റ് ഡെയ്‌സി വർഗീസ്, സ്‌കൂൾ പാർലമെന്റ് സെക്രട്ടറി ജീവമോൾ വർഗീസ് എന്നിവർ സംസാരിച്ചു.