പറവൂർ: യോഗ സാരഥ്യത്തിൽ കാൽനൂറ്റാണ്ട് പൂർത്തിയാക്കിയ എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശന്റെ ഒരു വർഷം നീണ്ടുനിൽക്കുന്ന രജത ജൂബിലി ആഘോഷങ്ങളുടെ ഭാഗമായി ചേർത്തലയിൽ നടക്കുന്ന ഉദ്ഘാടന സമ്മേളനം എസ്.എൻ.ഡി.പി പറവൂർ യൂണിയൻ തത്സമയ സംപ്രേഷണം കാണാൻ നൂറുകണക്കിന് ശാഖായോഗം ഭാരവാഹികളെത്തി. യൂണിയൻ ആസ്ഥാനത്തെ വെള്ളാപ്പള്ളി നടേശൻ രജത ജൂബിലി ഓഡിറ്റോറിയത്തിലെ വലിയ എൽ.ഇ.ഡി സ്ക്രീനിൽ ഉച്ചയ്ക്ക് രണ്ടു മണിയോടെ സംപ്രേഷണ പരിപാടികൾ ആരംഭിച്ചു. കെ.എൻ. ഉണ്ണികൃഷ്ണൻ എം.എൽ.എ ഉദ്ഘാടനം ചെയ്തു. യൂണിയൻ പ്രസിഡന്റ് സി.എൻ. രാധാകൃഷ്ണൻ അദ്ധ്യക്ഷത വഹിച്ചു. യൂണിയൻ സെക്രട്ടറി ഹരി വിജയൻ, വൈസ് പ്രസിഡന്റ് ഷൈജു മനയ്ക്കപ്പടി, യോഗം ഇൻസ്പെക്ടിംഗ് ഓഫീസർ ഡി. ബാബു, യൂണിയൻ കൗൺസിൽ അംഗങ്ങൾ തുടങ്ങിയവർ സംസാരിച്ചു.