പെരുമ്പാവൂർ: പൊലീസുദ്യോഗസ്ഥരെ ആക്രമിക്കുകയും ഔദ്യോഗിക കൃത്യനിർവ്വഹണം തടസപ്പെടുത്തുകയും ചെയ്തെന്ന കേസിൽ കടുവാൾ കണ്ണിയാറക്കൽ വീട്ടിൽ അക്ഷയ് സുരേഷ് (26), കടുവാൾ വടക്കേക്കരപ്പറമ്പിൽ അനിൽകുമാർ (47) എന്നിവർ അറസ്റ്റിലായി. തിങ്കളാഴ്ച രാത്രി പത്ത് മണിയോടെ ഭജനമഠം റോഡിൽ സംഘം ചേർന്ന് മാർഗതടസമുണ്ടാക്കി സംഘർഷം സൃഷ്ടിച്ച ഇവരോട് പിരിഞ്ഞ് പോകാൻ പറഞ്ഞ പൊലീസിനു നേർക്കാണ് അക്രമം അഴിച്ചുവിട്ടത്. അസഭ്യം പറഞ്ഞ് പൊലീസിന് നേരെ തിരിഞ്ഞ പ്രതികളുടെ ആക്രമണത്തിൽ സബ് ഇൻസ്‌പെക്ടർ ഉൾപ്പെടെയുളള ഉദ്യോഗസ്ഥർക്ക് പരിക്കേറ്റു. തുടർന്ന് സാഹസികമായി പ്രതികളെ അറസ്റ്റ് ചെയ്യുകയായിരുന്നു. സബ് ഇൻസ്‌പെക്ടർ റിൻസ്.എം.തോമസ്, എ.എസ്.ഐ അനിൽ.പി.വർഗീസ്, എസ്.സി.പി ഒമാരായ അഷറഫ്, നാദിർഷ തുടങ്ങിയവർ ചേർന്നാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.