കോതമംഗലം: തങ്കളം - കോഴിപ്പിള്ളി ന്യൂ ബൈപ്പാസിന്റെ രണ്ടാം റീച്ചിന്റെ നിർമ്മാണ പ്രവർത്തനങ്ങൾ ആരംഭിക്കുന്നു. കലാ ഓഡിറ്റോറിയം മുതൽ കോഴിപ്പിള്ളി വരെ വരുന്ന പ്രദേശത്താണ് രണ്ടാം റീച്ച്. നിർമ്മാണ പ്രവർത്തനങ്ങൾ ആരംഭിക്കുന്നതിനു മുന്നോടിയായി ആന്റണി ജോൺ എം.എൽ.എയുടെ നേതൃത്വത്തിൽ ജനപ്രതിനിധികളും പൊതുമരാമത്ത് വകുപ്പ് ഉദ്യോഗസ്ഥരും പദ്ധതി പ്രദേശങ്ങൾ സന്ദർശിച്ച് ഒരുക്കങ്ങൾ വിലയിരുത്തി. ഒന്നാം പിണറായി സർക്കാരിന്റെ 2019-20 ബഡ്ജറ്റിലാണ് ന്യൂ ബൈപ്പാസിന്റെ രണ്ടാം റീച്ചിന്റെ നിർമ്മാണത്തിനായി 10 കോടി രൂപ അനുവദിച്ചത്. എം.എൽ.എയോടൊപ്പം മുൻസിപ്പൽ ചെയർമാൻ കെ.കെ ടോമി, പൊതുമരാമത്ത് വകുപ്പ് സൂപ്രണ്ടിംഗ് എൻജിനീയർ കെ. ടി. ബിന്ദു, എക്സിക്യൂട്ടീവ് എൻജിനീയർ ഷിജി കരുണാകരൻ, അസിസ്റ്റന്റ് എക്സിക്യൂട്ടീവ് എൻജിനീയർ എസ്. ഷാജീവ്, അസിസ്റ്റന്റ് എൻജിനീയർ എം.എസ്. അരുൺ ഉൾപ്പെടെയുള്ള പൊതുമരാമത്ത് വകുപ്പ് ഉദ്യോഗസ്ഥരും ഉണ്ടായിരുന്നു.