പിറവം: എക്സൈസ് വകുപ്പിന്റെയും വിമുക്തിമിഷന്റെയും സഹകരണത്തോടെ തുടി ക്രിയേറ്റീവ് മീഡിയ നിർമ്മിച്ച് പിറവം എടയ്ക്കാട്ടുവയൽ (വട്ടപ്പാറ) സ്വദേശി സ്വാതി ബിജു തിരക്കഥയും സംവിധാനവും നിർവഹിച്ച ക്യരാസ് എന്ന ഹ്രസ്വചിത്രം പ്രദർശനത്തിന് ഒരുങ്ങുന്നു. നാളെ ഉച്ചയ്ക്ക് രണ്ടിന് വെളിയനാട് സെന്റ് പോൾസ് ഹയർ സെക്കൻഡറി സ്കൂളിലാണ് ചിത്രത്തിന്റെ ആദ്യപ്രദർശനം. എക്സൈസ് ഡെപ്യൂട്ടി കമ്മീഷണർ

കെ. അനിൽകുമാർ, വിമുക്തി മിഷൻ മാനേജർ ജി. സുരേഷ്‌കുമാർ എന്നിവർ ചേർന്ന് പ്രദർശനയോഗം ഉദ്ഘാടനം ചെയ്യും. എടയ്ക്കാട്ടുവയൽ ഗ്രാമപഞ്ചായത്ത് പ്രസിഡന്റ് കെ.ആർ. ജയകുമാർ അദ്ധ്യക്ഷത വഹിക്കും. കണയന്നൂർ താലൂക്ക് ലൈബ്രറി കൗൺസിൽ പ്രസിഡന്റും സാഹിത്യകാരനുമായ എ.കെ. ദാസ് ചിത്രത്തെക്കുറിച്ച് അവലോകനം നടത്തും.

എക്സൈസിന്റേയും വിമുക്തിമിഷന്റേയും പ്രവർത്തനങ്ങൾ പൊതുജനങ്ങളിലേക്കെത്തിക്കാനും മയക്കുമരുന്നുകളുടെ വ്യാപനത്തിൽ സമൂഹത്തിന്റെകൂടി ജാഗ്രതയും സഹകരണവും ഉറപ്പുവരുത്തി ലക്ഷ്യബോധമുള്ള തലമുറയെ സൃഷ്ടിച്ചെടുക്കാനും ആഹ്വാനം ചെയ്യുന്നതാണ് ചിത്രമെന്ന് അണിയറ പ്രവർത്തകരായ റെജി പക്ഷിക്കുഴി, മനോജ് സി.സി, പ്രിൻസ് ഡാലിയ എന്നിവർ പറഞ്ഞു.